Nyadi O.K.P. Dana “Bayang” di Padeh tu anak biak Orang Kaya Betie biak ke bejulok “Tajai Ngindang” seduai Endau. Menyadi bukai OK Dana “Bayang” tu iya nya Senaang, Isik, Nawi, Kitang, Suma enggau Mandah. Sida, leboh maia tu agi diau dalam ai Padeh, pati Batang Layar. Sanentang rumah sida maia tu, ari ulu rumah orang Nanga Lawing kediatu (1975 – source Mr. Bediman Anak Ketit – great, great, great grandson of OKD Bayang)
Leboh maia Endau ngandong ka Dana, dia seduai melaki bini bisi nemuai ngagai sida Nyuin ke bensumbar “Muntigerai” ba rumah sida di Tanu, ba tebing Batang Layar ari Ili Nanga Padeh. Udah tembu makai lemai, orang sepiak-sepiak pan datai mega ngulu temuai ke bisi datai. Nyau udah pulai tindok magang orang ke datai ngulu seduai iya, dia Endau tak enggai tentu tindok. Leboh iya ka agi dani kediri diri, dia iya ninga nyawa orang indu batimang anak, “ba adu-adu, ba adi-adi” keno ko dinga iya. Lama iya jenuh mending ka timang orang nya. Nyadi tunga bunyi orang nya asai ka ba saberai pengkalan ba urong julut Lubok Tanu muak ka ulu pengkalan sida Tanu.
Udah nyawa nya ngetu didinga iya, Endau pan enda berasai lalu lela mata deka tindok. Leboh ka tindok tu, dia iya lalu bemimpi tapeda ka indu siko. Indu nya lalu bejako enggau Endau, ko iya, “Ninga nuan nyawa aku ke betimang tadi Endau”? ko indu nya nanya iya.
“Ninga aku nyawa, tang jako enda tentu dadinga, mina ninga orang ti munyi ke nimang anak,” ko Endau nyaut.
“Eh, aku nya tadi Endau. Aku ga nimang anak ke ba kandong nuan nya. Nya ga anak aku ke mati lulus, tang nyadi iya ti da kandong ka nuan nya,” ko indu nya bejako enggau Endau. “Ila iya Endau, enti nuan beranak, lelaki anak nuan nya, lalu gaga ka nuan nama Dana. Iya ada mai ngeli sigi tumboh ari atas. Bunoh ka babi ila Endau, enti nuan udah beranak. Enggai ka nuan enda ngelala aku, aku tu meh Kumang bini Keling, indu orang ari Panggau Libau,” pia ko indu nya. Iya pan lalu ayas ari peda Endau. Endau pan lalu tedani, tang iya lalu enda nusoi mimpi diri ngagai orang leboh ke nya.
Sahari dua udah nya, seduai melaki bini pan lalu mulai ka diri ka Padeh. Nyau datai ba maia ke beranak, beranak meh ga Endau. Amat munyi ti ko mimpi iya ga utai ke nyadi. Anak iya lelaki lalu ada mai ngeli sigi tumboh ari atas. Meda bakanya, bala sida ke tuai-tuai bela madah ka diri nadai kala meda penyelai utai ti nyadi. Sida sama satuju runding ngasoh munoh babi siko kena ngintu Dana ti baru ada nya tadi.
Leboh umur iya baru ngangkat ka diri bujang, dia menyadi tuai iya Senaang seduai Isik mai Dana enggau seduai iya nebas umai enda jauh ari ulu rumah sida. Nyadi Senaang seduai Isik, laban ke tuai agi, endang udah bisi ruang bilik ka diri empu maia nya menya. Seduai mega siru sereta nelap bendar enggau adi bunsu seduai iya. Seduai mega endang diasoh apai sida ngiring serta ngajar Dana dalam semua pengawa. Leboh ka bumai kali tu, sida tiga menyadi bemalam ba langkau umai. Ari langkau nya tadi, tiap-tiap pagi, sida iya nadai ngetu turun nebas dandang umai sida.
Bisi sakali, leboh maia deka turun, dia Dana tak lalu apin dani tindok. “Lapa Dom tu tak lalu enda angkat,” pia ko Isik bejako enggau Senaang.
“Nyangka nya lelak meh Dom nya. Nadai iya kala bakanya. Awak ka iya tindok, lagi iya nemu nitih ka tua. Mupok meh tua,” pia ko saut Senaang. Seduai pan lalu nurun ga nebas pagi nya.
Nyau ngetu ngansah seduai iya, pulai ga seduai iya ka langkau. Datai di langkau, peda Dana endang agi tindok. “Eh, anang negu iya tua, nyangka iya bisi mimpi kini,” ko seduai iya bejako. Seduai iya pan lalu mupok ga nebas baru udah ke tembu ngansah.
Nyau maia ke ngetu tengah hari, pulai meh ga seduai menyadi ka langkau. Datai di langkau, peda seduai Dana endang udah dudok dani. Seduai iya lalu nanya kabuah iya bangat tindok ngelama nya. Dana lalu madah ka diri bisi mimpi. Ninga nya, seduai iya pan lalu ngetu ga nanya iya maia nya.
Nyau udah tembu pengawa sahari nya, udah sida tiga makai malam nya, nya baru Dana nusoi mimpi diri ngagai menyadi iya Senaang seduai Isik. Sapengelama iya ke tindok nya tadi dia Dana asai ka diau tiga malam begulai enggau orang di langit landai baka bingkai gelong tibang. Iya asai ka betemu enggau Endu Dara Tinchin Temaga ke gaga bendar ati, baka ka nyambut anak iya empu ke baru datai. Di langit din, Dana asai ka agi mit lalu tindok begulai enggau Endu Dara Tincin Tenaga, baka ke begulai enggau indai iya empu di menoa. Leboh ka diau din, dia iya asai ka diasoh Dara Tinchin Temaga nesa penyampau panau ba dada iya ari kiba ka kanan. Ditesa Dana ari kiba mansang ka tengah dada. Baru deka nyemerai ka kanan, lalu ditanya Dara Tinchin Temaga berapa udah kena tesa Dana.
“Baru ka lapan udah tesa aku, alai nuan lalu nanya aku. Aku pan lalu enda ingat agi,” ko Dana.
Udah nya lalu diasoh Dara Tinchin Temaga nya nesa panau iya baru ga Dana nya tadi. Bakanya ga Dara Tinchin Temaga nya enggau Dana. Baru deka nyemerai ka kiba tesa Dana, Dara Tinchin Temaga pan lalu nanya Dana berapa udah ditesa iya. Baka ke dulu tadi ga padah ka Dana.
“Nya alai Dana, “ ko Dara Tinchin Temaga, “Bisi Ribai deka datai ari tasik besai linggang gumbang ila. Anang ngelaban orang nya nuan Dana nyentuk ka lapan peturun, laban orang nya tau nyaup kita, tau mai pemansang ka kaban kita, tau ngasoh kita tampak rita tampak nama,” pia ko Dara Tinchin Temaga bejako enggau Dana.
“Nya alai, enti nuan ngayau, nyerang menoa, anang nyemerai ka tebing kanan undor Batang Saribas nuan, laban nuan enda tatesa ka panau ari kanan dada aku. Nyadi samoa ti ari kiba undor nya dana, nyamai nuan ngelaban, nadai munsoh tetan ka nuan, enti nuan nyerang sida jemah ila,” pia ko Dara Tinchin Temaga bejako enggau Dana.
Senaang seduai Isik pan ngenong ga ninga mimpi ditusoi Dana. Seduai iya lalu enda ngasoh Dana nusoi mimpi iya ngagai orang bukai dulu laban iya apin besai serta agi biak maia nya kelia. Nganti udah tembu nebas ila, nya baru mela mimpi Dana, pia ko jako sida tiga dia.
Nyau maia Dana angkat bujang, iya endang baka orang bukai ga pendiau iya. Semoa pengawa umai, ngasu beburu bela diasai ka iya magang. Laban nya ke batang pengidup bansa Iban kelia. Pengawa ngayau mulau nitih ka tuai-tuai bukai menya pan bisi ga iya kala enggau orang. Tambah ka mega apai iya empu, Orang Kaya Betie “Tajai Ngindang”, endang orang ke tau kayau tau mulau, tau serang tau pandang, teleba ngulu ka orang mindah ngalus ka menoa.
Apin iya nyadi tuai tau serang leboh iya benong ngangkat ka diri bujang, Dana bisi mimpi. Dalam mimpi iya, asai ka betemu enggau Kumang ti diau di tuchong Bukit Santubong. Dalam mimpi iya tu, Kumang enda ngasoh iya munoh sebarang orang ka diau sanebing Batang Saribas terus ngagai Luba Santubong enggau menoa ari kanan undor Nanga Saribas. Nya alai kategal mimpi iya tu, sepamanjai umor iya endang nadai kala ngalah ka Bansa Melanau ti diau sabelah luba Nanga Rajang enggau ngilah nya kin.
Nya alai ari mimpi iya nya tadi, tiap-tiap kali mansa Luba Santubong dalam pejalai iya mansang nyerang ngagai menoa ari luar nya, iya enda tau enda ngetu dua-tiga malam dia, awak ka ulih niki ka Bukit Santubong, deka nanya ngagai Kumang pasal pemujur serang sida.
Tasah Di Tanjong Kauk.
Nyadi sakali, maia udah lepa pengawa umai, bala Iban Saribas ari Layar enggau Padeh undor ka Tanjong Kauk, ba menoa ili di Supa, ari ulu Nanga rimbas, enggau orang betanggok ngulih ka ikan buntal. Nyadi ikan buntal tu endang bisi datai ngaban sakali sataun nganjong diri betelu sabelah batang sungai dalam Batang Saribas. Nyau baka kijap api perau mensia ba sabelah sungai enti leboh maia ikan buntal tu datai ngaban. Iban Balau enggau Lundu endang nemu Iban Saribas maioh undor nanggok buntal maia nya menya.
Leboh maia tu mega, Dana enggau menyadi tuai iya Senaang seduai Isik, sama bisi enggau orang betanggok ka buntal di Tanjong Kauk. Sida tiga mai sabuah perau lalu belabuh begulai enggau kaban bukai ka bisi datai dia. Enda mukai-mukai, leboh sida benong betanggok malam nya, dia deh bala Balau bisi datai ari ili mansang ngayau ka menoa Saribas. Bala ari Saribas endang nadai sedia ka perengka dikena ngelaban munsoh, semina duku ti dikena sida berikan aja dikena sida nan ka diri. Orang bukai ke sempat ngelari ka diri, bela lari ka tebing magang. Maia nya, Dana agi dudok ba luan perau mela ikan buntal ke ulih sida. Senaang seduai Isik baru udah pulai ka dalam perau. Leboh bala Balau datai ba perau sida tiga menyadi, dia deh Dana ke dudok ba luan perau, lalu kena tikau munsoh enggau perambut ti lalu lekat ba perut iya. Iya lalu muai ka diri ka ai lalu bapegai ba burit perau ari kemudi. Laban ari ke malam serta petang, dia deh iya enda dipeda munsoh agi. Ninga orang begau, Senaang seduai Isik lalu pansut ari perau. Meda Dana tak udah nadai agi peda seduai menyadi, seduai iya lalu bebai diri menyadi ngansak niki ngagai perau munsoh ngiga Dana. Perau sida tiga nya tadi lalu rarat mai Dana ke agi bepagut ba kemudi perau. Leboh ka beranyut nya, Dana semampai mending ka seduai iya menyadi belaban enggau munsoh, sampai ke seduai iya nadai da dinga agi. Berai mata tudah Dana ngingat ka penyiru seduai menyadi enggau iya kenyau ari iya agi mit menya. Tang meh iya nadai chara nulong seduai menyadi laban ke udah balat bakal bakanya.
Udah mati Senaang seduai Isik, dia deh bala Balau bisi ninga utai munyi gugu guntor datai ari ulu. Bala sida pan lalu nadai ati mansang agi laban takut ka bala besai ari Saribas datai begau mantu bala sida ke tasah. Sida lalu beguai nguing bekayuh rari pulai ngagai menoa sida iya empu.
Nyau tampak mimit hari, dia Dana lalu nyemerai ka tebing. Datai iya ditebing, iya lalu ngerayap niki ka tebing. Perambut ke lekat ba perut iya mengkang dia. Iya semina ngenatai ka diri ditebing, alai iya pan lalu luput. Leboh iya ke luput tu tadi, tak asai ka bisi indu siko datai semak iya dia.
“Eh, nadai nya ngapa deh Dana, tu aku Indai Abang datai ngubat nuan,” ko indu nya dinga iya. Udah nya lalu chabut iya perambut ari perut Dana lalu disembor iya enggau entemut. “Anang irau nuan Dana, gerai nuan lagi. Nuan pulai nebing ai tu. Aku pan mupuk dulu,” ko Indai Abang bejako enggau Dana. Peda Dana tak lalu lesap indu nya tadi. Iya pan ngeleda ari ke luput. Peda iya tak madang apong ngelingi iya dia. Iya pan berasai kering lalu mupok mulai ka diri ngulu ka Batang Ai Saribas. Datai iya di kampong laut ba Supa, iya lalu minta tulong laut dia nganjong iya pulai ka Padeh.
Serambau enggau maia tu kelia, bala sida Mullok seduai Luta ari Entanak, endang udah puas bekayau ka menoa ili ari tebing kiba undor Batang Saribas nyentok ka menoa Muara Tuang. Samoa menoa ke bisi diwan orang nebing kiba jalai undor ka Sarawak (Kuching), nadai enda udah dikayau seduai iya magang, ngulu ka bala ari Saribas.
Laban ke puas dikayau Iban ari Saribas, dia orang ke diau ba menoa ari nanga Saribas ngagai Tanjong Datu minta ulu ka bala pengari Sultan Brunei ke diau di Sarawak bebalas serang ngagai menoa Saribas. Sida iya lalu nyerang menoa Laut di Supa. Nya kabuah menoa nya datai ka saharitu pan dikumbai “Burok Rumah”. Rumah Laut ke enda kena tunu nyau burok diri, empa pengelama sida ke diau di menoa ulu sabelah Nanga Padeh udah bekau serang tu. Tang sida ke datai nyerang Saribas tu enda berani datai ba menoa Iban di Entanak, Padeh, Ulu Layar, Ulu Rimbas enggau Ulu Paku, ke endang deka dibalas sida. Nya alai semina kaban kitai bansa Laut aja ke tasah laban serang sida tu. Tembawai buah sida agi dipeda sampai ka diatu di Nanga Padeh.
Dana Bemimpi Diasoh Sempurai Jadi Enggau Mengan.
Nyau lama udah ke tasah di Tanjong Kauk, Dana pan nyau datai ba maia iya ti chukup umur niri ka ruang bilik kadiri empu. Malam siti, dia iya bisi mimpi asai ka betemu enggau Sempurai Munti Gerai Lancham Disimbang, Bungai Nuing Manok Biring Disabong Mali Lengang. Dalam mimpi iya ke tu, asai ka diasoh Bungai Nuing bebini indu benama Mengan. Lama iya berunding ka dini tunga menoa ke bisi indu benama Mengan, laban menoa semak Layar enggau Padeh dia nadai indu ti benama nya. Iya lalu nusoi mimpi iya ngagai indai iya Endau. Indai iya pan nadai jako, lalu nyendia ka iya ti deka nurun bejalai. Iya lalu angkat bejalai ngiga indu ka benama Mengan ngagai menoa Paku enggau Rimbas.
Datai iya di menoa orang Luban, dalam menoa pegai Paku ili, dia iya bemalam dia. Malam nya leboh ka berandau enggau orang ke empu bilik endor iya bemalam, dia iya nanya orang ke biak, enti bisi indu ke benama Mengan ba urong menoa nya. Sida pan madah ka bisi indu sida sarumah benama nya. Malam nya, orang ke biak lalu nganjong Dana ngagai pintu indu dara ka benama Mengan, ke tindok di sadau bilik sida. Leboh iya deka niki ka sadau nengah tiang, sepi iya tak lekat iko sirat iya.
“Ukai indu tu,” ko jako orang ke megai iko sirat iya. “Agi jaoh Mengan ti ko aku, ukai Mengan tu,” pia ko Bungai Nuing. Iya pan lalu merubus nurun ka ruai nikal ngagai endor iya ka bemalam. Nyadi Bungai Nuing nya tadi enda dipeda iya, semina jako iya aja didinga Dana. Nyau siang hari, udah makai apa indah pagi nya, alai iya madah ka diri mupok ngagai orang ke endor iya bemalam, agi deka bejalai ka bukai.
Angkat ari nya, Dana pan lalu bejalai nuju menoa orang Suri dalam menoa pegai Rimbas ili. Datai iya di Suri, iya pan lalu bemalam dia. Puas ka berandau jaoh malam, iya pan nanya ngagai pangan endor iya diau enti bisi Indu benama Mengan ba urong menoa nya dia. Bisi ga ko orang madah ngagai Dana. Udah orang nyau tegram tindok magang, angkat ga iya minta anjong anembiak ngayap. Leboh ka deka niki tiang ngagai sadau endor orang indu tindok, bisi ga Bungai Nuing narit iko sirat iya madah ka ukai Mengan ke nya ti diasoh iya ambi Dana ka bini. Enda ga Dana nyadi ngayap malam nya.
Nyau pagi siti, udah tembu dibela orang makai, Dana pan madah ka diri mupok baru ga bejalai, nuju menoa orang Rapong, dalam menoa pegai Rimbas Tengah. Nyau lemai ga hari, baru iya datai di Rapong. Iya pan lalu niki ga napat ka ruai orang ke ba pun penatai iya ke niki. Nyau udah pulai tindok orang bukai ke bisi ngulu berandau enggau iya malam nya, Dana lalu nanya orang ke empu bilik endor iya bemalam enti bisi indu ke benama Mengan ba rumah sida dia.
“Bisi kami ditu indu benama Mengan,” ko orang nya bejako enggau Dana, “tang iya udah belaki. Nama laki iya Luta bensumbar “Tangkong Engkabang”. Laki iya tu sakit, enda tau mindah serta lembut samoa tubuh.” Ninga nya, diau diri ga Dana. “Nyangka ukai Mengan tu ke diasoh orang ambi aku ka bini,” ko ati iya dalam din.
Udah nya, iya pan lalu nindok ka diri. Tak baru pejam keno ko mata iya, dia iya tak asai ka da tegu orang ba kaki. “Dani nuan Dana,” ko Bungai Nuing, “Mengan nya meh indu ti da asoh aku ambi nuan ka bini. Dini hari lagi, tumu iya nurun nyaok,” ko Bungai Nuing dinga iya.
Ninga Bungai Nuing munyi nya, Dana lalu dudok baru ga, nganti maia Mengan ke nurun nyaok dini hari nya. Nyau maia Mengan ke nurun nyauk, Dana pan lalu nurun ka pendai sida lalu nganti Mengai dia. Enda lama udah iya nganti ba pendai, peda iya datai indu siko minching labu nurun nyaok. Datai Mengan ba pendai sida, dia iya lalu tapeda ka Dana.
“Oh, bisi temuai datai?” ko Mengan nanya.
“Bisi, … datai lemai kemari,” ko Dana nyaut.
“Nama pejalai deh? ….. Pejalai lantang? tauka ka endang mansa enda lama?” ko Mengan ga nanya baru.
“Lantang pejalai aku tu Endun. Endang deka betemu enggau nuan.” Ko Dana nyaut.
“Ooh pia? … Nama igau nuan diau, nama mimpi nuan bangat tak nemu datai nyelinting aku?” ko Mengan ga nanya baru.
Dana lalu nusoi ngagai Mengan madah ka kabuah diri ke datai da Rapong dia. Mengan pan madah ka diri bisi ga mimpi diasoh Bungai Nuing jadi enggau orang ke benama Dana. Mengan mega madah ka diri udah belaki, tang laki iya lama udah sakit, enda tau engkebut, enda tau mindah. Mengan mega madah ka laki iya Luta endang udah nemu pasal mimpi Mengan ke diasoh antu jadi enggau orang ke benama Dana.
Ninga jako Mengan munyi nya, Dana lalu madah ka Mengan, iya deka batemu enggau apai-indai Mengan nya empu bejako ka pengawa seduai iya.
“Enti munyi nya, aku pulai dulu madah ka sida apai, ngasoh sida ngempuru ka orang pagi nya. Ari nya lagi baru tua nemu bakani ko runding enggau atur sida apai ba pengawa ke bakatu. Enti aku tu tak bedau belaki, nyangka nadai baleman sida iya ngadu ka aku, tang aku tu tak mengkang bisi laki, enda nemu kati ko chara sida apai ngadu ka utai baka tu. Nuan lagi lalu nitih ka aku lalu dudok nunga apai aku ke bekindu ba ruai kami din lagi.” ko Mengan bejako enggau Dana.
Pulai nyauk nya tadi, Dana lalu nitih ka Mengan, ngagai ruai sida apai Mengan empu. Datai iya ba ruai sida Apai Mengan, Dana pan diasoh apai iya lalu, dudok nunga bedilang ba tengah ruai sida dia. Mengan pan lalu tama ka bilik sida iya empu. Maia makai pagi nya, Mengan pan lalu ngangau ka apai iya enggau Dana sama tama makai. Leboh ka makai pagi nya, apai Mengan pan lalu nanya ka pejalai Dana. Dana pan lalu terus nusoi pejalai diri ke diasoh Bungai Nuing ngiga indu ka benama Mengan jadi ka bini iya.
Ninga saut Dana, laki Mengan ke sama bisi makai dia pagi nya pan lalu mansut ka jako iya. “Aku tu pan bakanya meh aya, unggal, enda nagang seduai iya jadi, laban aku empu endang udah dulu nemu, ari padah ka bunsu antu, bisi orang ke benama Dana deka ngambi endun ka bini. Nya alai, amat meh ko jako bunsu antu. Nya deh Dom udah datai ba kitai ditu. Kami duai endun endang udah ngadang utai ti baka tu deka nyadi,” ko Luta bejako.
“Enti munyi nya, nganti aku udah ngempuru ka bala maioh lagi, nanya ka panemu bala maioh ba sanentang pengawa ke bakatu. Nya deh endu nya tak mengkang bisi laki, kati ka chara nyara ka adat ba utai ke baka nya. Enti iya taka apin belaki, nyamai meh kitai belurus ka pengawa,” ko apai Mengan bejako enggau Dana seduai Luta.
Udah tembu makai pagi nya, apai Mengan pan lalu nesau bala sida sarumah, ngasoh sida gempuru ba ruai iya. Udah orang sampal datai, Apai Mengan pan lalu bejako nusoi kabuah iya ke ngangau ka sida sarumah nya ngagai ruai iya pagi nya. Semoa jako ke ditusoi Dana ngagai iya disebut iya magang ngagai bala sida sarumah. Udah abis jako iya, iya pan lalu nanya ka runding tuai-tuai ke bisi datai dia pagi nya. Orang bukai bela madah ka diri nadai panemu, lalu ngasoh Apai Mengan empu mutus ka runding laban iya empu endang tuai sida dia.
“Nyadi, laban endun tu endang meruan bisi laki, bisi ruang bilik ka diri empu, tang ruang bilik seduai iya tu direrak rumpang laban ari atur sida Petara, sida bunsu antu, munyi ko tusoi sida tiga ke empu tubuh. Ba sanentang tu, pemali ti pansut ari pengawa ke bakatu, enda tau enda dulu diaduka kitai. Kabuah pia, enti enda diadu ka kitai, utai tu dikumbai butang ngeladang, naka iya mali, tau mai menoa kudi bebali, ngasoh rumah kitai angat. Enti nya amat ari atur sida Petara, sida bunsu antu, Endun seduai Dom Dana tu enda tau enda jadi, awak ka adat kena nasih pemali bakatu ngena antu pala empat igi, agi bedarah. Nya alai enti Dom Dana tu satuju ka adat nya, tau meh iya jadi enggau Endun Mengan kitai tu, nadai pulai ka penusah, nadai pulai ka penanggul kitai di menoa tu. Adat bukai nya disebut dudi, udah pemali seduai iya tu da pensiang kitai dulu,” ko apai Mengan bejako ngagai bala maioh ke bisi dia. Orang bukai nyau enda engkertik ninga adat dipinta apai Mengan.
Udah nya Dana lalu nyaut madah ka diri deka ngisi adat nya, laban iya endang mutus ati deka jadi enggau Mengan. Iya lalu nimpoh diri datai baru hari siti nganjong adat ti dipinta apai Mengan.
Lemai nya Dana lalu nurun bejalai baru nuju antara menoa ke diwan bansa Iban enggau bansa bukai ngili sungai Melupa, pati Batang Awik. Maia nya menya, Iban endang bedau udah berumpang menoa sabelah nya dia. Semina menoa nya udah endor apai iya ngulu ka bala ngayau ngalah ka bansa Seru, lalu iya empu pan bisi ga udah enggau orang kia, nyadi ka bala apai iya empu. Nya alai, enda bangat lama iya udah bejalai sabelah menoa nya dia, alai iya lalu bulih empat igi leka balang berang. Iya lalu mulai ka diri ka Rapong. Datai iya di Rapong, antu pala nya lalu disambut bala enggau gawai enchaboh arong serta lalu bejadi ka Dana seduai Mengan nya melaki bini.
Udah abis pengawa nya, Dana pan lalu mai Mengan pulai ka Padeh. Seduai iya bedarat nengah menoa Rimbas, mansa menoa Paku ili, udah nya rembus di Layar ili. Datai seduai iya di Bebangai kanan, seduai iya lalu ngetu ba pangkalan orang Bebangai, berunding ka jalai mai Mengan nyemerai, laban menoa sida di batang Padeh mati’ ari kanan mudik Batang Layar. Dia seduai iya dudok nukung nat ka diri. Sakumbang ka nya, Dana lalu lela tindok, laban ke udah lelak bejalai jaoh. Leboh ka tindok, iya lalu bemimpi ninga orang ngangau ka iya.
“Oh Dana, nama nuan tak tindok deh?” ko orang nya dinga iya.
“Oh, aku tu berunding ka jalai kami duai Mengan meraka sungai Layar tu. Kami duai nadai perau dikena,” ko Dana nyaut kangau orang nya.
“Nadai nya da ketusah ka nuan deh. Nya jalai seduai meraka,” ko nyawa orang nya dinga iya.
Malik Dana, peda iya tak bisi jalai ba moa iya, bajembatan ka baya betemu moa, jagu batemu iko, terus ka saberai. Jambatan nya bekajang ka pua kumbu, belalau ka sumpit tapang. Seduai iya lalu meraka sungai Layar, bajembatan ka baya.
Datai seduai iya di saberai, Dana lalu ninga orang nya bejako baru, “Nya alai Dana, enti anak uchu nuan ila belaki bebini, tu meh adat dikena nuan enti iya jauh meraka menoa orang. Pua kumbu ambi ka kajang, sumpit tapang ambi ka lalau, babendai sajengkal papan sambang iya ambi ka pengangkat burit enggau ketawak ambi ka penudok iya datai ba bilik lelaki.” Orang nya tadi lalu madah ka diri Raja Baya. Udah nya tadi, peda iya tak lalu lesap jalai endor seduai iya meraka Batang Layar tadi.
Datai seduai iya da rumah sida, seduai iya lalu disambut Indai iya Endau enggau bala sida sarumah. Nyau berami meh orang dia nyelamat Dom Dana ke udah pulai mai bini, bebiau baka orang bukai ke pulai ngambi indu maia melah pinang.
Nyau berapa taun udah diau di Purau, sida Dana lalu pindah ka Buluh Lachau. Diatu, endor nya dikumbai orang Buloh Antu. Dana seduai Mengan maioh anak. Sida iya baka tu:
Tiong
Nanang
Ajie
Luyoh
Unting
Buda
Umpu
Landan
Kumang Badong tauka Indun
Pengangkat Nama Dana Nyadi Tuai Kayau.
Kira dalam taun 1819, menoa Sambas, Pontianak enggau Mempawa dipegai Perintah Belanda. Maia tu mega sida Dana diau di Buloh Lachau. Leboh ke diau dia, Dana barengkah bisi ati deka nguji ka diri memendu ayam ka kusun kangan saluntang, babujang jagong ka teluk kampong puang. Iya deka nguji mai bala iya ngunja menoa jauh, ka tasik linggang gumbang, laban menoa dalam Sarawak udah puas di kayau bala sida Unggang “Lebor Menoa”, sida Mullok seduai Luta enggau sida Linggi ari Semambu Bangkit orang ari Paku ili enggau sida Ijau Gima ari Skrang. Nya alai Dana enda ati nandu kayau sida nya. Iya mai bala iya ngalah ka menoa pegai perintah Belanda sapiak ka Sambas.
Bala sida Dana pan lalu begaga ka perau pengayau ti chukup iya besai kena sida meraka tasik ngelaban umbak besai. Pengawa tu dikerja sida enggau jalai beburong, serta piring ading chukup dikerja orang magang. Perau kayau sida tu muat saratus lima puloh iko tuboh, mesai perau sida Unggang “Lebor Menoa” dikena sida ngipa munsoh di nanga Sarawak ke dulu agi ari nya menya. Nyadi perau sida Dana tu digaga ka sida nama “Ketam Batu”. Langkau perau nya ba pangkalan lama sida di Buloh Antu, tang diatu nyau udah burok dilamun tanah.
Nyau udah tembu perau, serta maia ngetau udah ga abis, sida pan lalu ngadu ka diri deka undor nurun ngayau. Sida lalu batesau kulu-kili nyelinting bala ke endang tau dikarap ka ngerja pengawa ke baka nya. Iya mega nesau bala tuai-tuai batang ai bukai, baka tuai Batang Paku, Rimbas, Layar enggau Skrang ti bisi ati deka enggau iya nurun ngayau. Udah bala maioh nyanggup, sida lalu nimpoh hari beranti ba julut menoa antara Batang Saribas enggau Batang Lupar. Bisi dua puloh buah perau pengayau sama deka enggau nurun ngayau. Udah chukup pengawa beburong enggau bepiring, sida Dana lalu undor ngili Padeh, pansut ka Batang Layar, ngili Layar datai ka Nanga Saribas. Perau sida ari Layar, Rimbas, Paku enggau Skrang pan endang udah nganti dia. Ari semua perau ke bisi dia, perau Dana ti pemadu iya besai sakali, lalu ulih ngundan saratus lima puloh iko bala pengayau. Perau orang bukai endang mit agi laban semina digaga kena ngayau sabelah tebing tasik menoa Sarawak aja. Sida iya selalu nebing nyemerai Batang Lupar, lalu nebing kiba nyemerai baru ga di Batang Sadong lalu nebing berari. Enti leboh malam, ngetu ga sida bekayoh, nyau siang mupok ga bekayoh baru. Datai ba Nanga Sarawak, ngintai ka ai ke tedoh, nya baru sida nyemerai Nanga Sarawak, lalu nengah luba nuju ka Bukit Santubong.
Di Santubong, sida diau dia tiga malam, laban Dana deka niki ka tuchong Bukit Santubong nya kediri. Bala maioh diasoh iya nganti di perau, belelak ke udah jaoh bekaioh ari menoa sida iya da Ulu Padeh. Tiga malam Dana da tuchong Bukit Santubong, baru iya nurun ka diri pulai ngagai bala maioh ti nganti iya ba perau. Gaga bendar bala maioh meda iya bisi pulai. Angkat ari nya, sida bekayuh baru nyemerai Batang Lundu, lalu nebing berari, melunggang Tanjong Datu lalu terus nuju Nanga Sungai Sambas, pegai menoa Kalimantan Barat. Datai sida ari ili Pasar Sambas, sida lalu ngetu bemalam dia. Manok sabong iya ke benama Sabok “Gila Berani” seduai Akun “Bedindang” enggau sakeda bala bukai lalu diasoh iya niki ngabas pendiau bala munsoh ba pasar Sambas. Sida bukai nganti ba perau magang. Pulai sida iya malam nya, Sabok seduai Akun lalu nyerita ka gaya pasar Sambas ka deka da serang sida. Seduai iya madah ka bisi sabuah kapal dagang Belanda (Schooner Haai) belaboh ba puak sungai betungga enggau pasar Sambas. Nyadi kapal nya nadai maioh orang nyaga, laban kelasi bukai udah pulai ka darat.
Ninga munyi nya, Dana lalu ngasoh sakeda bala iya ngalah ka kapal nya malam nya, lalu bala besai nyerang pasar Sambas dini hari nya. Nyau deka tengah malam, bala manok sabong lalu niki ngagai kapal Belanda ke belaboh ba puak ai. Sida nadai beleman ngalah ka kapal nya lalu munuh tiga puluh tujuh kelasi bansa Belanda. Dia sida lalu berumban naban ka bedil besai sigi enggau perapasan bukai ke ulih diambi sida ari kapal nya. Sida iya pan lalu beguai mulai ka diri ngagai tugong bala maioh. Nyadi bedil nya tadi digelar sida iya “Bujang Timpang Berang” laban lengan bedil nya udah patah sapiak.
Nyau dini hari dalam, bala sida lalu nyendia ka diri betiki nyerang munsoh. Nyau baru tawas hari, sida lalu nyerang munsoh. Enda lama udah bamok, munsoh pan lalu alah, laban endang enda ngadang sida datai. Iya ke lari endang enda da kiboh ka sida laban munsoh ke nan endang sigi maioh. Leboh ka bamok tu, maioh bendar bansa China ti nan ka diri ngelaban ngena parang bingkok ti dikumbai “Tat” di bunoh sida. Barang sida ti ulih ngelari ka diri lalu lari ngagai nengeri Singkawang, Pontianak enggau Mentrado. Sida pan bulih bendar perpasan, tangkap enggau pala. Sida lalu beguai mulai ka diri ka perau enggai ka bala besai ari Istana Sultan Sambas begau. Nyau udah datai sida ba nanga sungai Sambas, dia sida lalu meda kapal besai bala Sultan Sambas nitih ka sida ari belakang. Sida lalu beguai bekayoh ngelari ka diri nuju Tanjong Datu. Meda perau Sultan Sambas nya naka sabuah aja ke nitih ka sida, Dana lalu ngasoh perau sida Skrang ke betuai ka Libau “Rentap” niki lalu nyerang perau Sultan Sambas.
Nyau semak perau Sultan Sambas, perau bala Libau “Rentap” lalu mutar ka diri nuju perau munsoh. Bala sida ari Skrang pan lalu niki bamok enggau bala Sultan Sambas. Bala ba perau bukai sama nganti semak sida dia, ngemata ka bala Libau “Rentap” bepantap enggau bala Sultan Sambas. Enda bangat lama sida udah bamok, bala Sultan Sambas pan alah. Leboh kayau tu Libau “Rentap” bulih keris sabilah ba-ulu emas.
Maya tu mega surat khabar, The Indian Archipelago, bisi ngenang bala Dayak ari Saribas enggau Skrang nyerang kapal perang perintah Belanda ti benama Schooner Haai lalu munuh tiga puluh tujuh iko kelasi bansa Belanda. Sida OKP Dana Bayang mega nyerang mensia ba sabelah tebing tasik menua Pontianakenggau menua Mempawa dalam kayau taun 1819.
(The war schooner Haai, stationed at Sambas, in Borneo, suffered considerably from a flotilla of thirty ” Dyak prahus,” which attacked her, in the year 1819. At the same time the coasts of Pontianak were much infested by Dyak pirates. At Mampawa an action took place with them. The chief of the place having learned that there were nine of their prahus at the mouth of the river, each manned by from thirty to forty of these notorious sea-banditti, resolved to attack them, though with a small force. They fought at close quarters, no other weapon being used than the klewang, a heavy sword or cutlass.)
(Mr. J. Bondriot – The Dutch Resident of Western Borneo, not of Sambas only. He certified that on one raid the Saribas and Sekrangs killed four hundred people on the Dutch coast. Referred to bv Earl in his Eastern Seas, he relates that the Dayaks swept the whole coast from Sekrang to Sambas, killing the entire population of Selakau. As far back as 1825, the Resident of Sambas and his secretary were killed on their way to Pontianak in a small vessel. Keppel tells us the Saribas once laid in wait for the Dutch man-of-war schooner Haai, and in one engagement killed thirty-seven of the Dutch, losing eighty of their own force.)
Sama taun OKP Dana Bayang ti ngalah ka Sambas, OK Rabong ari Skrang ngayau ngalah ka Balau Iban enggau Melayu ba Bukit Banting di Batang Lingga bebalas ka bala Balau ti udah nyerang Iban Skrang di Nanga Skrang.
“Chelap bendar kayau Dana, siko pan nadai ga bala gugor bulu,” pia ko jako bala maioh.
Datai di menoa, orang pan nyau rami mega besambut ka utai ulih orang pulai ngayau. Nyau begawai meh sida da Buloh Lachau dia. Udah abis gawai, orang ke enggau iya ngayau pan mulai ka diri.
OKP Dana “Bayang” Nyerang Banting
Meda pemujur kayau iya ke dulu nya, kira dalam taun 1820, dia deh Dana lalu ngempuru ka bala baru, mai bala ngayau ka Batang Lupar, ngagai menoa Lingga, nguji nyerang menoa Balau. Kebuah pia, laban iya saruran ingat ka pemarai menyadi iya Senaang seduai Isik, diserang bala Balau leboh ka nanggok Ikan buntal di Tanjong Kauk, agi iya biak menya. Nyau udah datai magang bala sida pan lalu ngadu ka piring enggau tambak burong dikena orang ngayau. Bini iya Mengan endang selalu ka tuai indu merengka piring ka dikena bala maioh. Datai ka sida iya nurun pan Mengan meh ngenulu ka bala sida indu nabur ka letup awak ka bala gerai nyamai, lempong tuboh leboh ka bamok enggau munsoh. Serak ka tu, sida iya undor bebai ka parengka gendang.
Bala sida ke undor ari Padeh nya endang enda berapa maioh, tang datai sida di Batang Layar, nya baru maioh agi bala ngisi perau sida iya. Sida ari Ulu Layar nganti ba menoa sida Tanu, lalu ka ili agi, bala ari Pasa, Luban, Bebuling endang udah nganti ba menoa sida Gima bensumbar “Remang Berarat” di Salulap. Ari nya tadi, sida ngejang ka diri undor ngili Layar datai di Stambak. Dia ngetu ga sida ngambi bala sida Sabok, sida Saang, sida Maang. Nyau maioh meh bala nambah udah datai dia.
Udah nya baru sida iya undor nuju Nanga Saribas. Leboh sida datai di Nanga Saribas, dia sida lalu tapeda ka perau bandong munsoh sabuah. Perau banding nya endang kena orang ngipa orang ari Saribas ti deka pansut mindah ka tasik besai. Dana lalu mai bala iya ngerapat perau banding nya. Sida lalu nebah gendang ke dikumbai sida iya “Raja Berangkat” tauka “Raja Beradu”, kena sida ngerapat perau bandong orang nya. Datai sida semak perau orang nya, sida lalu ngangau nanya ka sapa bempu perau bandong nya.
Orang ke ba perau bandong nya lalu pansut, nyaut sida,”Nadai utai ditanaya ka kita perau aku tu, tu meh perau Panglima Munang enggau Panglima Johari. Bandong kami duai menyadi tu. Lama kita udah ninga rita kami duai menyadi ngerumpak di menoa Sarawak tu. Niki meh bala kita, enti berani,” ko orang nya nyaut sida.
“Au, niki meh kami tu, lama bendar udah deka batemu enggau Panglima Munang,” ko saut sida Dana.
Gendin seduai Geraman lalu ngambu niki dulu ngagai perau bandong Panglima Munang. Seduai lalu tama ngagai bandong nya lalu bepantap sama betengali alan enggau Panglima Munang seduai menyadi iya Panglima Johari. Lama sida bukai ngemata ka sida empat nya belaban, laban orang bukai endang enda di asoh Dana niki dulu. Tak di teju ka iya belaban siko sama siko sida empat nya tadi. Bala sida Panglima Munang seduai Panglima Johari pan baka nya mega, tak ngemata ka sida empat nya belaban, baka orang ke nyabong manok. Nyau kelama, nya baru Panglima Johari alah laban Geraman, pala iya pan lalu dipumpong Geraman dia. Enda lama udah nya, Panglima Munang pan alah ga laban Gendin, lalu dipumpong iya dia. Bala lanun bukai endang enda ati ngelaban seduai iya, enggai ka bala Dana ngalun ka sida ngagai bandong sida. Sabedau bakejang enggau bandong Penglima Munang, Dana lalu ninggal ka jako enda ngasoh sida Lanun nya ngipa ba tasik Nanga Saribas agi. Berengkah ari nya, bala lanun lalu enda berani ngipa da tasik Nanga Saribas nya agi.
Udah kemas pengawa ngalah ka Penglima Munang nya tadi, sida Dana lalu nyemerai ka Nanga Batang Lupar, laban tuju sida endang deka ngalah ka menoa Banting. Datai di Lingga, sida pan ngetu ga dia. Udah nya baru sida mudik ka Banting. Datai di Banting, dia sida meda kuta orang Banting tegap bendar. Orang dia endang udah nemu munsoh bisi datai lalu nganti bala munsoh ba luar kuta, enggai neju ka bala munsoh tama. Bala Dana lalu niki, lalu batempoh enggau bala sida Banting ba moa kuta . Sapagi-pagi nya sida enda ngetu bamok, tang lalu enda talah ka pangan. Bisi mega bala munsoh bakal, tang lalu enda ulih da pumpong sida Dana.
Nyau tengan matahari niki, bisi siko sida ari Banting niki atas dinding kuta. Iya lalu ngangau ka bala maioh, ngasoh sida ngetu bepantap.
“Oh Dom!,” ko orang nya ngangau, “badu agi kita belaban. Lama bendar kita udah belaban, enda ga talah ka pangan. Umbas nya deh. Kita ga sama sakaban, sama sabala.”
Orang nya lalu nurun ari dinding kuta lalu bejalai nuju Dana. “Tu aku, aya kita Manang Insing, menyadi apai nuan. Badu agi kita belaya,” ko iya bejako enggau Dana.
Bala sida ke bepantap tadi lalu ngenong ninga kangau orang tuai nya. Sida pan sama ngetu ga bamok, lalu satuju badu agi ngelaban pangan. Duku, pedang, ilang pan sama ga diselit ka sida pulai ka sarang. Dana pan lalu betemu enggau aya iya Manang Insing. Udah sida nemu nya diri sabala, sida pan nyau betabi, baberap pangan diri. Bala sida Dana pan lalu dibai orang niki ka rumah orang Banting, bekelala enggau kaban iya ari Banting. Leboh ke berandau dia, nya baru iya berunding ka jako Kumang ke enda ngasoh iya munoh orang ari kiba nanga Saribas terus ngagai Luba Santubong.
Nyadi Manang Insing seduai Kalabu tu menyadi Betie “Tajak Ngindang”, apai Dana. Sida diri menyadi nya bakatu:
1. Garaik
2. Kalabu
3. OK Betie “Tajak Ngindang”
4. Suma
5. Mandah
6. Manang Insing
Nyadi Manang Insing seduai Kelabu tu bebini ka Banting. Nya ke bisi nurun ka kaban ari Banting. Udah pengawa bebaik di kerja sida di Banting, Dana “Bayang” nadai agi mai bala nyerang orang Batang Lupar agi. Iya semina nyerang menoa kilah Nanga Batang Lupar ngagai menoa Kalimantan Indonesia. Bala sida Dana pan lalu pulai ka Padeh, mai pala Panglima Munang seduai Panglima Johari aja.
Nama Dana “Bayang” pan lalu barengkah pegari dalam menoa Saribas enggau Batang Lupar. Manok sabong ti pemadu di karap ka iya bendar nya : Sabok “Gila Berani” ari Stambak, Uyu apai Ikom ari Julau, Unal “Bulan” ari Ulu Layar, Linggir “Mali Lebu” ari Paku, Igoh apai Lamban, O.K. Akun (Bedindang). Laban pemerani sida manok sabong tu, semua kayau O.K.P. Dana Bayang nadai kala enda mujor. Sakeda manok sabong Dana mega nyadi orang tau serang, tau pandang, tau kayau, tau mulau baka iya empu. Sida tu Unal “Bulan” ari Ulu Layar seduai Linggir “Mali Lebu” ari Paku.
Rambau tu menya, laban ka disukong tuai-tuai Batang Layar, Batang Paku enggau Batang Skrang, serta dibantu bala manok sabong ti endang nyadi ka sintong dudok iya, OK Dana “Bayang” nyadi tuai ti pemadu iya bekuasa, serta dikarap ka semua tuai Iban dalam menoa bagi kedua. Munsoh bukai nadai berani datai nyerang menoa Saribas maia nya menya.
Dana “Bayang” Ngalah Ka Undup
Kira dalam taun 1822, dedau lama ke udah pulai ari Banting, bisi temuai tuboh tiga iko datai ari Skrang, Kumpang enggau Lemanak nemuai nepat ka sida Dana “Bayang” di Buloh Lachau, Padeh. Sida tiga tu betuai ka tuai siko ti benama “Lang Labang” ari Skrang. Leboh ka berandau malam nya, Dana “Bayang” lalu nanya ka pejalai sida tiga.
Nyaut meh ga Lang Labang madah ka pejalai diri. “Nyadi, bisi pejalai meh kami tiga tu, Apai Tiong,” ko iya bejako. “Pejalai tu berat bendar. Ngelamatu kami ari Skrang, Kumpang enggau Lemanak nyin selalu belaya enggau bala kitai ari Undup enggau Bansa Dau. Pendiau bala kami da tiga bengkah menoa nya selalu tasah laban ke selalu diserang bala sida tu. Leboh kami nyerang malas sida, kami enda ta alah ka sida, laban Kuta sida tegap bendar, tak enda ulih alai kami tama. Tambah mega sida selalu dibantu bala Balau ari menoa ili nyin. Maioh bendar bala sida Undup nya dia,” ko Lang Labang bejako. “Nya alai, ngasai ka pemerinsa selalu kena kachau bakatu, penemuai kami tiga tu minta bantu nuan bebalas nyerang Iban Undup, Iban Dau enggau bala Balau ke bisi mantu sida. Minta nuan mai bala kitai ari Saribas tu nyah bala kami ari Skrang enggau Batang Ai nyin, ambi ka tuboh kitai maioh agi.” ko Lang Labang nya nampong jako iya.
Lama Dana “Bayang” enda nyaut. Orang bukai ke bisi ngulu temuai dia nadai engkeretik siko. Udah nya baru iya bejako. “Iban Undup, Iban Dau enggau Balau ukai munsoh aku, nya alai enggai bendar aku ngemasok ka diri ngagai laya tu,” ko iya.
Tak ngenong sida tiga ninga saut Dana “Bayang” munyi nya. Udah nya, Lang Labang lalu bejako baru. “Aku tu tak keras bendar minta bantu nuan, Apai Tiong. Tak nadai runding agi kami tiga bengkah menoa nya dia. Enti semina kami aja ngelaban munsoh nya, tentu kami enda ulih ngalah ka sida nya. Kami endang suah udah alah laban munsoh tu dalam kandang berapa taun ti ka udah. Nya alai tak suntok bendar runding kami ba utai tu. Tak sabarang ko nuan ngadu ka penusah kami. Kami ke tu tak sanurut aja meh nya,” ko Lang Labang.
OKP Dana Bayang lalu nanya sida tiga, “Sapa orang ti deka di padu ka kita nyadi tuai kayau ngelaban munsoh tu deh akan?” ko iya..
“Kami datai kitu endang udah mutus runding, endang ngambi nuan nyadi ka tuai kayau,” ko Lang Labang nyaut.
Ninga sida tak berat bendar minta bantu iya, OKP Dana Bayang pan sinu serta deka berunding ka peminta sida. Iya lalu madah ka sida, sabedau iya nyanggup ngulu ka sida ngayau, iya dulu deka nanya semua bala Manok Sabong iya dulu serta enggau semua Tuai Kayau bukai di Saribas laban deka nemu paneka sida enggau iya ngayau ka sekali tu. Orang seruan ari Skrang, Lemanak enggau Kumpang nya tadi lalu diasoh OKP Dana Bayang nganti berita ari Manok Sabong serta enggau Tuai Kayau ari Batang Ai bukai dalam kandang dua tiga hari nya.
Dalam kandang dua tiga hari nya, tuai sida ari Ulu Layar, iya nya Unal “Bulan” enggau manok sabong iya Igoh apai Lamban enggau Uyu apai Ikum, datai madah ka sida sama setuju deka enggau ngayau. Linggir “Mali Lebu” ari Paku pan madah ka diri enggau bala manok sabong iya deka enggau, tang sida iya apin sempat mindah nama apin abis nugal umai bukit.
Serta OKP Dana Bayang udah nemu runding semua Tuai Kayau Saribas bukai enggau Manok Sabong sida ti setuju deka enggau ngalah ka Undup, iya pan lalu ngasoh bala seruan ari Skrang, Lemanak enggau Kumpang nya pulai awak ka madah ngagai bala sida din, iya enggau bala manok sabong iya ari Padeh, Layar enggau Paku deka datai enda lama agi ka Skrang.
“Nya alai, bakatu ko semaia kitai,” ko Dana “Bayang” bejako enggau sida tiga, “Nama bulan tu peranama ila, kitai beranti di Skrang. Bala aku tetap datai bedarat melunggang ka Skrang. Ari nya ila kitai melunggang ka Nanga Lemanak. Bala kita ari Lemanak nganti penatai kami dia. Ari nya kitai lalu melunggang ka Kumpang, nyuong bala sida ari menoa nya dia. Ba rumah sida Kumpang dia ila kitai beranti ka bala “Mali Lebu” ari Paku.”
“Enti munyi nya panemu nuan, besedia meh kami. Pulai tu ila, kami tiga ngasoh bala kami batesau, milih orang ke tau enggau bebala maioh,” ko Lang Labang gaga ati nyaut Dana “Bayang”.
Nyau udah diadu ka Indai Tiong makai sida pagi nya, serta disediaka bekal, sida tiga pan lalu mulai ka diri enggau ati ti andal bendar, mai berita ngagai bala diri empu di Skrang, Lemanak enggau Kumpang. Menoa, amat nya enda sabaka Batang Ai ke endor diau, tang menoa sigi enda jauh ari pangan enti melunggang ari ulu langgai sungai. Enti ditusut ka, semua orang sabelah menoa nya enggau orang Undup, Dau enggau Balau, endang sigi sama diri sakaban. Tang laban orang kelia tau sapeneka ati bebunoh ka pangan diri nama enda lantang ati, nya kabuah nyau nyadi ka laya besai bebalas ka pangan diri.
OKP Dana Bayang pan lalu milih manok sabong iya empu nambah ka enggi sida Unal “Bulan” ari Ulu Layar enggau sida Linggir “Mali Lebu” ari Paku. Manok sabong iya ka di bai OKP Dana Bayang iya nya Sabok “Gila Berani”, Akun “Bedindang” enggau anak iya empu ke benama Nanang seduai Luyoh. Manok sabong Unal “Bulan” ari Ulu Layar nya Igoh Apai Lamban seduai Uyu apai Ikom. Nyadi manok sabong Linggir “Mali Lebu” ka enggau ngayau tu di ketuai ka Enchana “Letan Pulas Mas”, Birai “Jawa Jambai”, Minggat Apai Runai enggau Chulo “Tarang Bulan”.
Leboh semua pengawa ke nyendia ka kayau udah tembu diator, sida OKP Dana Bayang enggau beratus-ratus bala iya lalu angkat ari Padeh. Sida melunggang ka Skrang lalu terus bejalai nuju Nanga Lemanak. Dia sida meda endang udah maioh bala orang Lemanak nganti penatai sida Dana. Ari Nanga Lemanak, sida lalu bejalai nuju menoa orang Kumpang. Leboh sida datai dia, sida meda nyau beribu-ribu bala endang udah nganti penatai sida. Bala ari Lemanak enggau Kumpang sampal bendar datai, laban sida balat bendar siga dikayau orang ari Undup.
Malam nya leboh ka berandau enggau tuai-tuai bukai, OKP Dana lalu nanya ngagai sida berapa penyampau sida ari Skrang, Lemanak, Saramat, Belambang enggau Kumpang udah sedia deka enggau bala. Sida madah ka iya bisi dua tiga ribu iko ti endang udah datai, lalu enda temu pemaioh ti agi deka datai. Udah ninga tu OKP Dana Bayang nanya sida baru sekali ka sida amat milih iya ngulu ka bala. Tuai sida lalu nyaut endang agi nitih ka semaia dulu, sigi ngambi iya jadi ka tuai ngulu ka bala. OKP Bayang pan lalu madah ka sida enda ngasoh sida angkat dulu, laban agi nganti penatai Linggir “Mali Lebu” enggau bala iya ari Paku ka agi nembu ka tugal umai sida. Nya alai sida Kumpang kiroh bendar ngintu bala pengayau dalam kandang dua minggu leboh ka nganti penatai Linggir “Mali Lebu” enggau bala iya ari Batang Paku.
Berapa hari udah nya, baru bala Linggir “Mali Lebu” datai. Malam nya OKP Dana Bayang pan lalu mai orang barengkah baum ka pasal kayau. Dalam aum nya, iya lalu nusoi ngagai Linggir “Mali Lebu” pasal pemutus runding sida Batang Lupar ti udah niri ka iya jadi ka tuai ngulu ka bala ngalah ka Undup. Linggir “Mali Lebu” pan lalu setuju serta madah ka atur nya betul bendar laban ko iya, ” nadai tuai bukai ditu bisi lebih agi ari nuan ti udah suah agi ngulu ka bala ngerja pengawa bebala besai baka tu. Enti ukai nuan, OKP Dana “Bayang”, di padu nyadi ka tuai bala kitai, aku enggau bala manok sabong aku nyangka enda enggau bebala tang lalu pulai ngintu pengawa umai di menoa din,” ko Linggir “Mali Lebu” nampong jako iya tadi.
Udah ninga saut Linggir “Mali Lebu” nya tadi, OKP Dana “Bayang” pan lantang bendar ati. Iya pan lalu madah ngagai semua tuai bukai utai ti enda tau enda di kerja dulu dikena nyendia ka Kayau. Iya ngatur dua iko ari tuai ka dia ngiga tambak burong deka di bai sida ngayau jadi ka tanda burong sida. Tumu pagi hari siti, seduai pan lalu nurun ngiga tambak burong. Apin lama udah nurun, siko ari seduai lalu ninga Ketupong Kanan, lalu tuai ka siko agi lalu ninga Beragai Kiba.
Udah nya, pagi siti OKP Dana Bayang agi ngasoh tuai dua iko bejalai ka babas ngiga tambak burung baru nambah iya ka udah. Siko ari seduai iya ninga Pangkas Kanan, lalu enchabut anak kayu ka tambak burong. Iya ka siko agi lalu ninga Embuas Kiba. Udah tembu nya tadi, seduai lalu bejalai sama ngiga tambak Kelabu Papau Kiba.
Lalu enggau tambak burung nya tadi, OKP Dana Bayang lalu madah ngagai bala tuai ka dia, “laban kitai bisi semua tambak burong tu, nama-nama pan burong bukai bisi didinga kitai leboh kitai mansang nurun ngayau ila, nadai tau pulai ka pengachau kitai,” ko iya.
Malam udah tembu pengawa ngiga tambak burung, sida pan lalu ngadu ka piring ading dikena sida miring ngagai Petara awak ka sida ulih nulong ngalah ka munsoh enggau lantang. Udah tembu pengawa miring, lemambang dua iko lalu diasoh barenong kayau ngangau ka orang Panggau Libau enggau Gelong datai nulong serta enggau sida iya ngayau ngalah ka munsoh. Lemambang ka barenong tu tadi endang mangkang mahligai pengaroh enggau senjata ti udah diengkah dalam mahligai awak ka orang ka bujang berani ari Panggau Libau enggau Gelong nyumpah samoa perengka perang pulai bisa lalu mujur dikena sida. Leboh lemambang udah badu barenong dinihari nya, sida pan lalu makai pagi. Tembu makai, tuai kayau pan lalu ngempuru ka orang baum laban deka nanya ka mimpi siko-siko malam nya.
Udah samoa bala penguang nusoi mimpi diri, OKP Dana Bayang pan lalu nanya ka mimpi tuai rumah empu. Saut tuai rumah, “mimpi aku malam nya asai ka munoh kaban beruang, udah nya aku lalu malik serta meda maioh bendar bangkai kaban beruang mati nyau baka garing kiba-kanan. Udah nya mega, aku asai ka ngalah ka kaban nyumboh, lalu leboh aku malik udah nya, peda aku bangkai nyumboh nyau baka garing sabelah tanah ngelingi aku dia.”
Udah ninga ka mimpi Tuai rumah nya tadi, OKP Dana Bayang pan lalu ngasoh orang ti manah buah mimpi mupok nurun mansang nyerang enggau iya. Sida pan lalu mupok bejalai nuju menoa orang Undup. Leboh sida bejalai nengah jalai nuju menoa Undop, OKP Dana Bayang ngasoh bala ngetu enda lama, laban deka barengkah ngusok ka burong ka didinga sida serantau jalai sepagi nya. Reti ngusok, ngetu enda lama kena bebasa ka burong ke bisi didinga sida sahari nya. Udah tembu ngusok, sida lalu majak ka pejalai sida, sampai ka sida datai ba endor sabengkah ti endor sida ngetu. Dia sida bemalam tiga malam beburong ka nyawa Ketupong kanan ka didinga leboh ka ngambi tambak burong nya suba. Tembu tiga malam sida beburong ba endor nya, sida lalu majak ka pejalai sida baru sampai ngagai tengah hari ka endor sida ngetu samalam ngibun tambak burong Beragai Kiba.
Tumu pagi siti, OKP Dana Bayang lalu ngerah bala bejalai baru ngagai antara menua enggau munsoh. Ba rantu jalai sida lalu ngetu samalam baru laban deka ngibun tambak burong Pangkas kiba. Hari siti sida lalu bejalai baru, lalu datai ba entara menoa enggau munsoh, maia tengah hari rapas. Dia sida lalu bedampa awak ka bisi endor sida diau. Leboh orang ka biak agi tu benong bedampa, OKP Dana Bayang lalu ngasoh Sabuk “Gila Berani” seduai Bedindang ngulu ka bala dua belas iko bejalai ka dalam babas ngikup ka bala pengayau sabelah menoa nya dia ngagai jauh malam enggai ka dilanggar munsoh enggau ngenyit.
Pulai sida ngikup malam nya, OKP Dana Bayang lalu nanya ka berita sida. Bedindang lalu madah ka bala sida bejalai begadai-gadai dalam babas enda nengah arong jalai, lalu masok ngagai menoa munsoh. Sakeda sida niki puchok mengeris awak ka tampak endor sida meda ka endor rumah munsoh. Sida meda rumah panjai munsoh ari jauh. Udah tembu berati ka gaya rumah munsoh nya, sida lalu mulai ka diri ngagai tugong bala malam nya.
OKP Dana Bayang lalu nanya Bedindang, “enti kitai angkat tumu ari tu, ni ka maia kitai datai nuntong ba rumah munsoh?”. Bedindang lalu madah ka OKP Dana Bayang “Kitai tentu ulih datai din apin tengah hari. Kitai tau berapi dulu pagi nya enti kitai deka datai din maia tengah hari rapas.” Ninga nya OKP Dana Bayang lalu ngerah bala berapi udah tengah malam awak ka ulih bakejang ari nya rerak tawas.
Tumu pagi siti sida lalu angkat bejalai nuju antara menoa ka semak rumah munsoh nya tadi. Datai sida ba pun kayu mengeris ti endor bala pematau ngila ka gaya rumah panjai munsoh dulu agi ari nya, OKP Dana Bayang lalu mai bala diau dia malam nya awak ka berandau ka atur deka negah munsoh.
Lemai nya, OKP Dana Bayang lalu ngangau bala pamesai tuai kayau iya baum. Dalam aum nya, iya ngasoh Sabuk “Gila Berani” seduai Bedindang mai dua iko bala bukai nengkilun ka pemindah munsoh semak ka agi. Sakeda pengayau bukau diasoh iya jaga ngelingi dampa arau sida enggai ka dialah ka munsoh enda ngadang.
Pagi siti, Sabuk “Gila Berani” seduai Bedindang enggau dua iko sida bukai lalu nyau nurun mansang nengkilun ka bala munsoh. Sida empat pulai ngagai dampa arau endang udah jauh lemai. Lemai nya OKP Dana Bayang lalu nanya rita sida empat ka nengkilun ka pendiau munsoh. Ko Bedindang, sida bejalai nengah jalai tang nadai batemu enggau munsoh. Semadi leboh sida udah datai nyau semak bendar enggau rumah panjai munsoh, sida bisi ngemata ka ari puchok kayu. Pemanjai rumah dipeda sida bisi tiga-puloh pintu. Rumah panjai tu betuai ka siko tuai Iban Undup ke benama Jarub, kedua bali nama iya, Penglima Unjar.
Ninga rita nya, OKP Dana Bayang lalu ngasoh bala pengayau mengkang diau dia sahari da agi. Malam nya iya lalu ngerah bala tumu tindok ngiga mimpi. Bala ti ngambi kayu kena berapi diasoh ngambi kayu ti udah chukup mati serta rangkai bendar awak ka enda berasap enti dikena berapi laban sida udah semak bendar ari rumah munsoh.
Hari siti leboh bala pengayau ke biak nyau ngambi kayu api ka babas, tuai-tuai kayau serta enggau bala pengayau ti endang tau dikarap landik serta berani, lalu berunding ngiga jalai dikena ngalah ka rumah panjai munsoh nya. Sida ke berandau dia diulu ka OKP Dana Bayang empu, ditangkan ka Linggir “Mali Lebu” enggau Unal “Bulan”. Semua atur udah putus magang ba aum malam nya, semina nganti ka barengkah agi. Dalam aum nya, OKP Dana Bayang mega nanya ka pemaioh rumah munsoh dalam Batang Undup ngagai orang Kumpang. Sida madah ka ngagai iya, rumah munsoh di Batang Undup maioh lalu sakeda nya bisi udah dialah ka enggau jalai Kayau Anak.
Ninga tusoi sida ari Kumpang munyi nya, OKP Dana Bayang lalu madah ngagai bala maioh, “Nyadi pejalai kitai ke bebala maioh tu baka tu. Laban aku udah minta bantu ari semua tuai kayau ari Batang Saribas ti berani serta bisi bendar paneleba dalam pengawa tu, aku enggai ngetu ngapa ngalah serta nyerang rumah munsoh datai ka semua sida alah magang nitih ka penembu ati aku. Aku ukai semina deka ngalah ka sabuah rumah munsoh aja, tang samoa rumah panjai munsoh sekayu Batang Undup. Nya alai udah kitai ngalah ka sabuah rumah panjai munsoh ka tarubah iya tu, kitai lalu bepalan ari rumah nya ngalah ka rumah panjai bukai,” ko iya madah ka sida. Bala tuai maioh pan nadai bantah, amat ga munsoh nadai ngachau menoa kitai agi.
Udah badu makai pagi nya, OKP Dana Bayang lalu ngerah semua tuai kayau nusoi mimpi diri malam nya ba moa maioh. Udah abis bala maioh betusoi ka mimpi diri, OKP Dana Bayang lalu nanya ka mimpi bala tuai kayau ari Padeh, Paku enggau Layar. Sida bela madah ka ngagai iya , semua lantang magang dalam mimpi.
Udah ninga ka semua utai tu, OKP Dana lalu bejako enda ngasoh sida ke jai mimpi enggau nurun bebala, tang pulai ngagai rumah ara diri empu. Iya lalu ngatur tuai-tuai kayau nyengkaum Linggir “Mali Lebu” seduai Unal “Bulan” ngulu ka bala mansang nyerang Rumah Jarub nengah tiga batang jalai baka tu:
Tuai kayau iya empu ari Padeh bejalai ari tengah jalai.
Manok sabong Linggir “Mali Lebu” nengah jalai kanan.
Manok sabong Unal “Bulan” nengah jalai ari kiba.
Manok sabong orang ari Kumpang, Skrang, Lemanak, Seremat enggau Belembang diasoh diasoh bejalai ari belakang sida tu magang bebagi-bagi.
Sabuk “Gila Berani” seduai Bedindang bejalai dulu ka bala ba jalai tengah. OKP Dana nyemetak bendar jako madah ka bala ti ngena jalai tengah enda sekali-kali diasoh masok ka dalam rumah munsoh. Sida semina ngipa munsoh ti pansut ari rumah.
Serta hari terbak tawas, benong munsoh makai pagi, sida lalu ngenyit ngelanggar rumah munsoh ke benama Jarub. Dalam serang tu, maioh bendar bala munsoh parai, semina mimit aja ti bakal. Barang ti ulih lari, lalu ngelari ka diri. Perapasan maioh bendar ulih sida, baka tajau lama, bedil temaga, bendai enggau setawak.
Udah OKP Dana ditusoi ka Bedindang pasal serang sida tu, iya lalu ngasoh sida nguan rumah nya serta lalu dijaga enggau tegap awak ka likun ari langgar munsoh. Bedindang, Sabuk “Gila Berani”, Nanang enggau Luyoh lalu nyau ngulu ka manok sabong bukai bejalai nuju antara menoa nya enggau rumah panjai sabuah agi berati ka bala munsoh enggai ka bala munsoh ngenyit malas lalu ngelanggar bala sida. Sida bukai ti tinggal lalu napok perapasan sida sabelah babas ngelinggi rumah ti udah alah lalu diwan sida jadi ka palan.
Udah badu babela makai lemai lemai nya, OKP Dana lalu ngagau tuai-tuai kayau serta tuai bala bukai baum ba palan iya dalam rumah panjai nya. Sida bukai ka enda enggau baum diasoh iya jaga rumah ngelinggi nya dia. Dalam aum serak tu, iya ngasoh semua manok sabong enggau bala bukai sama ngingat ka jalai enggau akal sida ka nyerang lalu ngalah ka rumah panjai nya tadi lalu ngena atur nya nyerang rumah bukai ka deka diserang sida dia. OKP Dana lalu ngasoh Sabuk seduai Bedindang bejalai serta nengkilun ka pendiau munsoh hari siti, apin sida barengkah nyerang.
Datai ba maia hari siti Sabuk seduai Bedindang lalu mai bala dua tiga iko nengkilun ka bala munsoh ba rumah panjai ka ari ulu sida. Datai sida dia sida nadai meda orang siko laban orang dia udah lari dua tiga hari dulu ari nya.
Leboh sida pulai, sida lalu nusoi berita sida ka matau munsoh nya ngagai OKP Dana. Ninga rumah panjai munsoh nya nadai orang agi, iya pan lalu ngerah bala ngalah ka rumah nya pagi siti. Sida angkat ari nya nyerumba rerak tawas. Atur sida bejalai baka atur ka pejalai ka dulu agi ari nya. Leboh ka belangar tu, ka dua iko aja munsoh dibunoh sida. Rumah panjai tu alah enggau mudah laban munsoh udah ninggal ka rumah nya dulu ari nya. Bala sida lalu nguan rumah nya.
Leboh sida udah nguan rumah nya, bala manok sabong lalu belatur nyaga rumah nya. Sabuk seduai Bedindang lalu bejalai jauh ka dalam babas berati ka bala munsoh enggai ka bisi nginau sabelah menoa nya lalu ngenyit nyerang bala sida. Leboh seduai rembus ba umai orang, seduai lalu batemu enggau dua iko orang melaki bini ti mansang deka mantu munsoh. Leboh tapeda ka seduai, bini lelaki nya nyau getar-getar takut. Sabuk seduai Bedindang lalu nanya ka penunga seduai. Seduai melaki bini madah ka diri datai ari Merakai, Kalimantan Indonesia laban bisi ninga berita Rumah Jarup di Ulu Undup dialah ka orang Kumpang. Sabuk seduai Bedindang pan bisi ninga berita nya lalu deka nemu berita nya terang agi ari orang ka empu rumah nya. Orang melaki bini nya tadi lalu madah ka ngagai Sabuk seduai Bedindang, orang ti agi ulih ngelari ka diri ari langgar munsoh lalu lari ngagai rumah panjai Suring di Ulu Undup lalu diau serta belindung dia. Sida mega udah minta bantu bala Kantu ari Merakai nulong sida nan ka rumah ngelaban penyerang ari Kumpang.
Udah ninga semua rita tu, Bedindang seduai Sabuk pan madah ka diri deka pulai lengkas dulu awak ka ulih mantu bala Sureng nan ka diri ari langgar munsoh. Seduai pan lalu mulai ka diri ngagai bala sida lalu nusoi rita ti ulih seduai ngagai OKP Dana.
Udah ninga berita tu OKP Dana lalu bejako nunga tuai orang Kumpang, lalu nanya ka runding sida pasal ka deka ngalah ka rumah Sureng. Sida bela nyaut enda ulih meri penemu laban udah arap enggau penuh ka OKP Dana serta samua tuai bukai ari Saribas enggau bala manok sabong sida nulong munas serta ngalah ka sida ti selalu nyerang orang Kumpang dalam kandang empat lima taun ti udah lalu.
OKP Dana pan lalu nanya ka tuai sida ari Lemanak, Skrang, Seremat enggau Belembang pasal ti deka ngalah ka rumag suring. Sida bela nyaut madah ka diri endang nitih ka kayau OKP Dana ngagai sebarang kayau ti diulu ka iya.
Udah mending ka runding tuai kayau ari Batang Lupar, OKP Dana lalu nanya ka penemu Linggir “Mali Lebu” ari Paku serta Unal “Bulan” ari Layar. Linggir seduai Unal lalu mansut ka jako. “Kami tu ga udah nitih ka kayau serta mantu bala OKP Dana ngelaban Undup, Kami duai enggai ninggal ka nuan sa-agi-agi nuan ngerja pengawa tu.”
Udah ninga runding bala maioh, OKP Dana pan lalu bejako, “Enti semua runding udah sagala munyi nya, kitai patut majak ka pengawa ti deka ngalah ka Iban Undup. Kitai anang kakang ngulu ka bala ngelanggar rumah Sureng, ti endor bala munsoh udah nguta diri ari bantu bala Kantu enggau orang bukai ari menoa Indonesia.”
Malam nya OKP Dana ngasoh sakeda bala manok sabong iya bejaga jauh dalam babas ngelingi endor nya enggai ka bala munsoh bisi belalai matau bala sida. Iya mega ngelalau bala iya enda ngasoh munoh bala munsoh ti bisi meda bala munsoh dalam babas. Sida ka bejaga tu diulu ka Sabuk “Gila Berang seduai Uyu Apai Ikum. Sakeda sida ngaga kuta ngelinggi nya kena nagang pemudah tempoh munsoh enti munsoh bisi datai. Sida mega lalu nan beribu-ribu tukak digaga ari batang nibong serta buloh temiang.
Hari siti Bedindang seduai Uyu Apai Ikum bejalai ngagai umai orang ti endor Sabuk seduai iya betemu enggau munsoh melaki bini dua hari dulu agi ari nya. Kebuah seduai bejalai kia nyangka munsoh enggau bini iya mengkang agi dia nganti bala Kantu bukai ti datai mantu bala Sureng di Ulu Undup. Datai dia seduai nadai agi meda munsoh nya dia. Nya alai seduai lalu majak ka pejalai seduai jauh agi sampai ngagai seduai rembus ba pendai semak rumah panjai Sureng.
Leboh seduai benong bejalai sabelah menoa semak rumah munsoh nya, seduai lalu tapeda ka orang dua iko benong mungga kayu api ba tebing sungai. Seduai lalu nanya ka penatai sida tak bebala maioh baka nya. Sida madah ka Bedindang seduai Uyu, sida datai ari Merakai sama enggau pangan sida ti benong mandi dibaroh ba sungai. Bedindang lalu nanya ka pemaioh sida udah datai nguang Sureng. Siko ari munsoh nya tadi lalu lalu madah ka orang ari maioh buah rumah di Merakai bisi datai tiap-tiap hari nulong nan ka rumah Sureng.
Uyu pan lalu nanya, sekali ka bala ari Merakai enggau bala Sureng semina deka nan ka rumah ari langgar munsoh aja tauka nyerang munsoh dulu. Orangnya lalu bejako madah ka semua parengka ti dikena bamok udah tembu magang, lalu Sureng deka ngulu ka bala nempoh bala munsoh ba palan munsoh empu pagi pagila. Ninga tu Uyu seduai Bedindang pan lalu madah ka diri deka mandi enggau pangan sida ba pendai di ili dia sabedau niki ka rumah Sureng. Seduai lalu beguai-guai mulai ka diri ngagai bala sida.
Udah datai ba langkau palan, OKP Dana enggau bala tuai bukai lalu ngulu Uyu seduai Bedindang nanya ka berita seduai ti udah pulai matau munsoh. Seduai lalu nerang ka sida pasal pejalai seduai ke datai ba pendai rumah Sureng ka endor seduai betemu serta berandau enggau orang dua iko ti madah ka seduai iya bala Sureng dibantu bala penguang Kantu deka datai nyerang sida pagila lalu enda nan di rumah Sureng empu. “Nya alai kitai enda tau enda nyendia ka diri ngelanggar sida ba rumah sida empu tauka kitai nan ditu pagila,” ko Uyu nusoi berita ngagai OKP Dana enggau tuai-tuai ke bisi dia.
Nya alai tak sahari-hari nya sida majak nguta palan sida enggau chukop tegap serta lalu nambah ka pemaioh tukak ditanam sida ba samoa endor ari luar kuta sida.
Udah badu makai lemai nya, OKP Dana lalu ngangau ka baum baru ba endor iya, awak ka mutus ka semua kerja ka nyendia ka diri. Dalam aum nya iya ngator lapan iko manok sabong ti dikarap ka iya bendar diulu ka Bedindang seduai Uyu Apai Ikom negah bala munsoh enggau ngenyit, tang nganti kira dua puloh iko udah masok kandang antara enggau rumah panjai sida iya empu. Pia mega iya ngelalau bala maioh enda ngasoh sida ngamok dulu, sebedau sida ti diasoh ngipa negah munsoh, baik ka munsoh nitih ka sida tau ka enda.
Tumu pagi siti Uyu, Bedindang sama enggau orang bukai ti udah diator nyempulang seduai lalu nyau ngagai endor sida ti negah, enda tentu jauh ari endor kuta sida. Udah tembu sida belatur, sida lalu barengkah ngeram ka ipa ba tisau jalai. Enda bangat lama udah sida ngeram ka ipa, nya baru bala besai munsoh datai mansa jalai sanentang sida ka ngeram ka ipa. Sida lalu angkat ari ti ngipa lalu negah bala munsoh serta nachah ka munsoh ti udu bendar tekenyit. Sida udu bendar bamok enggau panjong-panjong. Leboh ninga panjong sida, bala ka tinggal ba kuta lalu ngadang serta ngatur diri ba endor ti manah, nan ka rumah enggau kuta ari dalam pagar kuta. Sida bamok udu bendar.
Bala munsoh nyau enda nemu utai asai nya agi diansak ka bala pengipa. Enti sida surut, sida dijamah orang ka ba kuta. Sida nyau baka rauh, lebih agi leboh sida kena tebak tukak apin sida datai ba senentang rumah panjai ti udah tegap bendar kena kuta sida OKP Dana. Bala munsoh maioh bendar parai lalu iya ka bakal mega ditangkap sida.
Udah pukas sida ka bamok tu tadi, OKP Dana lalu meda ka pemaioh bala iya ka bisi bakal. Bala sida ari Kumpang enggau Belambang bisi parai. Tang laban sida ka bamok tu tumu tembu, nya alai bisi bendar hari sida numbak ka bangkai bala sida ti bisi parai udah tengah hari nya.
Nyau udah makai lemai nya, OKP Dana lalu ngangau ka baum baru. Dalam aum tu iya bejako mai bala ngalah ka rumah Sureng tumu pagi siti. Iya lalu ngasoh semua manok sabong ti landik serta taleba nyendia ka diri lamai nya. Orang bukai ka enda ulih enggau nyerang diasoh nyaga kuta enggau orang ka bakal. Sabuk lalu bejako madah ka nya bebuai dadu bendar ninggal ka sida baka nya laban enti munsoh datai baru nyerang kuta tu, tentu sida ka bakal serta sida bukai enda ulih enggau nyerang tu nadai penyadi. Tang ko OKP Dana, “munsoh tentu enda datai agi udah ka rusak bendar kena alah ka kitai pagi tadi. Udah sida alah bendar baka nya, samoa penguang Sureng tentu pulai ngagai menoa sida empu di Kalimantan Barat.”
OKP Dana lalu bejako mai bala ngelanggar rumah munsoh ngintai ka maia sida makai pagi rerak tawas. Malam nya semua sida diasoh nat ka diri enggau chukop serta tindok tumu ngintai ka mimpi. Agi dinihari dalam, OKP Dana lalu nanya ka mimpi bala sida. Iya lalu ngasoh bala sida ka enda manah mimpi tinggal lalu nyaga bala sida ti bakal enggau sida ti enda enggau tadi. Iya samina mai semua sida ti manah mimpi enggau iya.
Leboh sida datai ba rumah panjai Sureng leboh maia rerak tawas, OKP Dana lalu ngulu ka bala iya masok ngagai rumah Sureng. Iya lalu dientudi ka Linggir “Mali Lebu” seduai Unal “Bulan”. Leboh sida bejalai nengah ruai nyandang nyabur ba jari sida, sida nemu ka dua-tiga iko aja munsoh bisi diau ba rumah nya. Leboh bamok sida nyau ka munoh semua munsoh enggau nadai penangul. Sida lalu pulai ngagai palan sida enggau lantang laban nadai bisi siko bakal. Sida bulih bendar tajau lama, setawak, bendai, chapak lama enggau utai bukai jadi ka perapasan dibai sida pulai.
Kena nanda pamenang iya ti ngalah ka Undop, OKP Dana Bayang semina mai benda Guchi sigi ti agi mengkang disimpan peturun iya di Lubok Nibong, Baram, nambah ka benda menaga enggau benda rusa. Linggir “Mali Lebu” beperapasan ka benda menaga sigi ti diintu bala ichit iya di Matop, Paku. Bala manok sabong ti bukai sama bela bulih perapasan magang, baka tajau lama enggau bedil temaga enggau parengka temaga bukai.
Udah bekau tasah diserang bala OKP Dana Bayang enggau orang ari Kumpang, orang Undup lalu lari ngagai dua bengkah bagi menoa. Maioh agi sida ngagai Salimbau dalam Kalimantan Barat, lalu ti bukai nya lari ngagai Ulu Lingga lalu diau enggau bala Balau.
Nyau kelama udah nya menya, leboh Mr. Brereton megai kubau Skrang, sida diasoh pulai baru ka Undop, tang leboh sida datai dia sida nemu menoa Skrang Ili udah diwan orang ari Skrang, lalu di Ulu Undop udah diwan orang Kumpang.
Research note on OKP Dana Bayang Raids as recorded by western writers:
Dalam taun 1810, iya ngulu ka bala besai Iban ari Saribas enggau Iban ari Skrang ngalah ka China di pasar Sengkawang. Maioh mega sida ditangkap lalu dibai pulai, lalu turun sida bedau diau di menoa Saribas datai ka diatu.
Kategal maioh bendar munsoh udah lari ngagai menoa Mentrado leboh iya ka ngalah ka Sengkawang, OKP Dana Bayang lalu ngalah ka Mentrado dalam taun 1814, ngena perau pangayau 180 buah ari Saribas enggau Skrang. Leboh bamok ka sekali tu, nyau beratus-ratus china mati di dengah sida, lalu ka mimit aja tangkap olih sida lalu di bai sida pulai. Diatu turun sida mega agi mengkang diau di menoa Saribas enggau Skrang, lalu sakeda bisi mega dijual ngagai tuai Melayu.
Udah iya ka mujor bendar ngalah ka Mentrado, OKP Dana Bayang mai tuai Melayu Saribas enggau Iban ari Skrang ngalah ka nengeri Sungai Raya dalam taun 1815. Sida babendar amat bamok, serta maioh bendar bulih dengah nyengkaum munoh bansa Selakau enggau Dayak Lara ti diau nisau menoa nya.
Lima taun udah bekau ka ngalah ka China Mentrado, dalam taun 1819, OKP Dana Bayang ngulu ka lebih 100 buah perau pengayau Melayu enggau Iban ari Saribas serta Skrang mansang ngalah ka Sambas, Nengeri Pontianak enggau Mampawa. Sida bamok babendar amat ngalah ka kandang nengeri. Sida besatup enggau bala munsoh ti tegap bendar, lalu munsoh agi nitih sida ka tasik ngena perau. Leboh kayau tu, manok sabong OKP Dana Bayang diulu ka Libau “Rentap” enggau bala iya ti badengah bulih sabuah perau pala Melayu Pontianak, serta bulih perapasan keris sabilah ti beulu ka mas.
Dalam taun 1825, OKP Dana Bayang mai 120 buah perau ari Batang Saribas enggau Skrang ngalah ka bansa Dayak Selakau enggau Kampong Melayu ti diau dalam garis menoa Sambas dalam menua pegai Kalimantan Barat. Sida Selakau enggau bansa Melayu tu mega di bantu bala Iban Lundu ti di betuai ka OK Temenggong Jugah, anak lelaki Nyambong ti udah pindah enggau bala iya ngagai endor nya. Kebuah Iban Lundu masok ka diri ngagai laya Iban Saribas enggau Dayak Selakau ari dendam lama antara Sebuyau enggau Saribas. Lebih 100 dengah ulih bala sida OKP Dana Bayang leboh ka tu. Pia mega bala sida pan bisi mega kena bunoh munsoh dalam serang ka sekali tu.
Maya tu mega bisi siko penulis bansa Belanda ke benama Mr. J. Bondriot, bisi nyebut pekara tu dalam surat berita Indian Archipelago, “The Dutch Resident of Western Borneo, not of Sambas only. He certified that on one raid the Saribas and Sekrangs killed four hundred people on the Dutch coast. He relates that the Dayaks swept the whole coast from Sekrang to Sambas, killing the entire population of Selakau. As far back as 1825, the Resident of Sambas and his secretary were killed on their way to Pontianak in a small vessel. Keppel tells us the Saribas once laid in wait for the Dutch man-of-war schooner Haai, and in one engagement killed thirty-seven of the Dutch, losing eighty of their own force.
The Indian Archipelago mentioned:
The war schooner Haai, stationed at Sambas, in Borneo, suffered considerably from a flotilla of thirty ” Dyak prahus,” which attacked her, in the year 1819. At the same time the coasts of Pontianak were much infested by Dyak pirates. At Mampawa an action took place with them. The chief of the place having learned that there were nine of their prahus at the mouth of the river, each manned by from thirty to forty of these notorious sea-banditti, resolved to attack them, though with a small force. They fought at close quarters, no other weapon being used than the klewang, a heavy sword or cutlass.
Mr. J. Bondriot – The Dutch Resident of Western Borneo, not of Sambas only. He certified that on one raid the Saribas and Sekrangs killed four hundred people on the Dutch coast. Referred to bv Earl in his Eastern Seas, he relates that the Dayaks swept the whole coast from Sekrang to Sambas, killing the entire population of Selakau. As far back as 1825, the Resident of Sambas and his secretary were killed on their way to Pontianak in a small vessel. Keppel tells us the Saribas once laid in wait for the Dutch man-of-war schooner Haai, and in one engagement killed thirty-seven of the Dutch, losing eighty of their own force.
Dalam taun 1843 (11/6/43) leboh Sir James Brooke seduai Admiral Keppel ngalah ka Saribas ba Nanga Padeh. Udah ti alah belanggar di Nanga Padeh tu nya ngujong ka OKP Dana Bayang enggau Linggir “Mali Lebu” dikangau ka Rajah James Brooke ngagai kapal iya di Tanjong Sabuloh dalam kandang Saribas Ili ngasoh seduai iya nyerah ka diri nundok ka Parintah. Tang iya enggai nyain surat ti ngasoh iya nyerah laban iya agi enggai nundok tau ka ngelala Perintah ti di pegai Rajah Brooke. Lalu maia nya mega Rajah James Brooke bisi nulis pasal seduai ti munyi tu:
“Orang Kaya Pemancha Dana Bayang ari Saribas diatu bisi lalu ngagai aku …iya tu orang ti pemadu iya diketakut ka serta mega mutus berani. Iya enda besai gamal lalu pendiau iya likun serta umur iya nyau tuai. Lengan kanan iya singkong lalu tuboh iya penuh laban litan abi pantap serta abi tumbok sangkoh. Aku deka bendar berati serta merening gamal iya, lalu ari semua tuai bukai dalam batang ai nya, ba runding aku, iya siko tuai ti pemadu pandai serta lurus ngiring bala anembiak iya.”
“Siko agi tuai bansa asal ti sama bisi lalu ngagai kapal aku iya nya Linggir. Tubuh iya baruh, manah bendar di peda. Mata iya gining-gining baka perening mata ular bisa leboh iya duduk atas deck kapal. Aku enggai badu merening ulah iya ti likun laban ari perening mata iya ti tajam bisi pangering, pemintar lalu nemu beparagam ka utai dudi hari ila. Silak mata iya mit serta tajam indah baka jarum kompas.”
Serta udah pukas kayau tu, maioh bendar tuai-tuai Saribas baka sida OK Antau “Linggang Negeri” seduai menyadi iya OK Gun “Mangku Bumi” ari Rimbas ngalah ka Iban Sebuyau enggau bala ti enda besai, bebalas ka tegal Iban Sebuyau ti mantu bala balau ti barengkah ngelaban Iban Saribas ba menoa sida iya empu di Rimbas, Paku enggau Padeh.
 |
| burung beragai |
OKP Dana Bayang kena jangkit penyakit Tampok Buah lalu parai ditambah ka penyakit bukai dalam taun 1854 lalu ditumbak ka di pendam Terusu dalam Padeh. Anak iya ti benama Umpu mega parai sama kena jangkit penyakit dalam taun nya.
Udah parai OKP Dana Bayang, iya lalu diganti anak lelaki iya ti benama Aji tauka Saji nyadi ka tuai di Padeh enggau Ulu Layar nyengkaum Spak. Taja Aji biak agi ari Nanang seduai Luyoh, tang iya berani serta landik agi megai orang ari aka tuai iya dua iko nya. Iya nyadi tuai enda lama, engka empat taun aja, laban iya parai leboh ka betachah enggau munsoh ba Sungai Langit dalam bulan April, 1858. Iya lalu diganti menyadi iya OKP Nanang jadi ka tuai.
OKP Nanang mai bala iya bebaik enggau perintah Brooke dalam taun 1861 ba kaki Bukit Sadok udah Raja James Brooke besemaia mayar 400 igi rusa dikena nundok serta bebaik. Iya lalu dibai Perintah Raja Brooke ngalah ka Kayan di ulu Rajang dalam taun 1863. Laban pemerani iya serta enggau penaluk iya ka perintah Raja Brooke, iya diberi Rajah Brooke pangkat Orang Kaya Pemancha ba moa tuai-tuai bukai ke begempuru di Fort Alice, Simanggang dalam taun 1886.
Note on Bujang Timpang Berang:
Cape Sirik (Tanjong Sirik), a point which is continually advancing seaward, that some forty to fifty years ago the remains of a wreck were discovered a considerable distance from the sea, and so must have belonged to a ship wrecked many years before. When Rentap’s stronghold in the Saribas was captured by the present Rajah in 1861, an old iron cannon dated 1515 was found there. Traditions exist pointing to wrecks and to the existence of hidden treasure at two or three places along the coast.
Note on Buda and Christainity: (as extracted from a book “Sketches of Our Life at Sarawak” written By Harriette McDougall)
The Rev. Walter Chambers lived at Sakarran for some time, but gathered no converts. He then settled himself among the Balows of the Batang Lupar and Linga, and when there was a community of Christians from these rivers, at Banting, where Mr. Chambers had built his church and house, a Sarebas chief, Buda by name, the son of a notorious old pirate, happened to meet some of these Christian Dyaks, and came himself to be taught. He brought his wife, sister, and child. They walked upwards of eighty miles, partly through the mud of the sea-shore, carrying their mats and cooking-pots with them, and established themselves in the mission-house, where they were kindly welcomed, and stayed six weeks, during which time they were so diligent that they learnt to read and made some progress in writing. This was in the rainy season, when all farming operations are in abeyance. The next year they returned at the same time, but, meanwhile, they had not been idle, but had taught all they knew to their countrymen. Shortly afterwards Buda was made a catechist, and he excited so much interest, that in 1867 Mr Chambers baptized one hundred and eighty of these people, who were once the most dangerous enemies of the English an d the most notorious pirates of Borneo.
Then Buda proceeded to the village of Seruai, and Mr. Chambers had soon to visit there, for the people were so earnest they would scarcely let him sleep, nor seemed to require any sleep themselves, but day and night learnt the hymns and catechism, which they must know by heart to be baptized. Nearly two hundred were baptized on the Kryan River. A catechist had been placed there, called Belabut. He married Buda’s sister (Kumang Badong or Indun), who walked to Banting for instruction. She had much influence over the women of the tribe, and Mr. Chambers said it was delightful to hear her read “her beloved gospel” with the correct pronunciation of an English lady.
The Christians of the Kryan did not keep the good news to themselves, but proceeded to teach the next village of Sinambo. In these villages there are now school-chapels, built by the Dyaks themselves. In 1873, Mr. Chambers, who was then bishop, wrote: “These Sea Dyaks have made the greatest advances in civilization and Christianity. Looking back even five years, there is a great difference. They have abandoned superstitious habits.” “They no longer listen to the voices of birds to tell them when to sow their seeds, undertake a journey, or build a house; they never consult a manang [Heathen doctor.] in sickness or difficulty; above all, they set no store by the blackened skulls which used to hang from their roofs, but which they have either buried or given away to any people from a distance who cared for them, assuring them at the same time that they ‘were no use.'”
Note pasal Jerita Uyu Apai Ikom:
0 comments:
Post a Comment