Adat & pengawa melah pinang(betusut,batang tusut)

BETUSUT.

ABIS JAKO panjai, nya baru tampong betusut. Betusut enda tau enda awak ka nemu penyauh enggau penyemak seduai ka jadi, sakali ka bisi bebelit tauka nadai. Enti sema bisi bebelit dia orang katuai ngadu ka enggau adat kena muai pemali. Enti seduai ka jadi nya endang ditemu ukai orang bukai enggau pangan, lalu enda bebelit nadai tentu guna betusut dalam, tang semina nusut ari ni iya serara awak ka orang maioh nemu penyauh enggau penyemak seduai. Enti sema orang jadi enggau petunggal diri menyadi orang nadai nyebut betusut.

Tusut dalam maioh penatai, tang samoa pun ari antu magang, baka ari Sengalang Burong, ari Kumpang Bedarah, ari Beji enggau ari maioh pun bukai. Tang ditu aku deka nusoi tusut ari Sengalang Burong ari pun ngagai tuboh Beti. Ari Beti ngujong ka ngagai aki ini kitai empu.

BATANG TUSUT.

Abu datai ari munggu tinggang guntur beranak ka Nising datai ari perenching pandang lambor. Nising beranak ka Bedali bejulok tiang balang besegi sarat muat balang bedabong bebini ngambi Antok Nyinok Langgong Tibilong, Dayang Kumang gasing merengong beranak ka Beda’am ngembuan perugan danan gelong ka bengkong bebini ngambi Jawai Mupong bepadong tujoh ringkat, Mau ka tinjau bekabelap beranak ka Beda’ang bejulok api mandang sundang surong, bebini ngambi Dara Saur pengukor mata isau pengundor bala nyerang beranak ka Aki Lang Sengalang Burong, Aki Jugu Menaul Tuntong bebini ngambi Indai Kechendai bepantak jerak, Dara Entaba balun kupak. Tang iya tabin bebirin enda pengerai, sakit lengit enda nvamai, pedera renga nadai asai. Dipesaut ka Manang Likup, dipelian ka Jaban, dipetawai ka Gendai, mindah nama disebut orang Endu Sudan Berinjan Bungkong, Endu Diu Tiong Menyalong beranak ka Dara Tinchin Temaga, Endu Cherebok Mangkok China belaki diambi Menggin beranak ka Sera Gunting bebini ngambi Seri Ngiang beranak ka Sera Kempat bebini ngambi Ranjau beranak ka Ridoh datai ari buloh bauh rejang belambang belaki di ambi Bada beranak ka Gupi anak umbong, belaki diambi Belang Pinggang Antu Gerasi, beranak ka Geraman bebini ngambi Tebari beranak ka Chundau bebini ngambi Beragai beranak ka Beti digelar Bujang Berauh Ngumbang bebini ngambi Duri beranak ka Talak. Beti tujoh kali bebini, tujoh kali balu.

Lalu Beti ke diajar Puntang Raga enda agi ngasoh mantang orang ke beleman salah serak. Ari ajar Puntang Raga tu nya kabuah Beti enda nyadi mantang Abang ke deka jadi salah serak enggau Dayang Tali Bunga.

Ajar:Naka tu tusut tusoi aku lalu ari tu iya mechah kia-kia nabor sebelah menoa. Tusut beserara laban orang kalia baka kitai ke diatu maioh diri menyadi. Nya alai orang ti nemu tusut nyamai bendar nemu kaban diri. Asai sepi aku, patut samoa kitai ngajar anak-uchu kitai betusut, enda iboh tusut dalam, amat ga nemu nusun aki ini diri empu ngagai empat lima serak. Enti orang ke biak enda diajar nama aki enggau ini ti ngada ka apai enggau indai pan enda ga sida nemu. Lebih agi anak kitai ti diau di nengeri lalu begulai enggau bansa bukai. Indah jako diri empu deh enda tentu terus agi disebut sekeda ti udah dipeda aku empu. Umbas aku ngenang pemanah betusut, nya alai diatu kitai pulai baru ngagai pengerami melah pinang.

PINANG DIBELAH.

UDAH ORANG tembu betusut, enti bisi salah, bisi bebelit lalu diadu enggau adat awak ka nadai agi pemali. Enti sema ukum penyalah bisi pulai ngagai ukum duit, lalu dipedua samoa orang katuai dia ti ngator, tang enti mimit aja bebelit semina lungga bebelit aja dipinta ngagai iya ti melit. Udah nya baru apai indai indu tauka orang ti dikarap ka iya bejako madah ka adat diri empu baka derian enggau bunga pinang. Enti apai indai lelaki nerima adat nya nitih ka pinta apai indai indu, sida lalu nyua ka samoa utai nya dia. Udah nya baru ari lelaki malas madah ka pemesai adat aki ini diri, baka penudok penyandih enggau utai bukai enti bisi. Lalu apai indai indu mega nyua ka samoa adat ti dipinta enti sida nerima. Enti adat indu enggau lelaki enda dipadah ka dulu, melah pinang apin tau dipenyadi. Iya tau numboh ka pengachau enggau laya.

Lepas nya, baru ngator melah pinang. Terubah milih indu siko enggau lelaki siko ti endang pemulih utai, chukop penuai, maioh anak sereta ripih seduai pan ngena, reti nya pangkat unggal. Udah mutus ka berapa sirap pinang enggi lelaki enggau enggi indu, nya baru seduai tama ka bilik lalu miring dia.

Piring nya tadi disimpan begulai dalam selok bebuah dibelit enggau lampit enggau sengkiling laban endang asal bansa Iban keran ka anak tuai nya indu. Nya kabuah ngelagu selok nya nitih ka pekayan indu. Udah chukop adu baka pendiau anak mit dipeda, lalu disandik indu ti dipilih tadi enggau pua kumbu tauka belantan lalu begadai pansut ka ruai. Lelaki tangkup iya tadi udah nganti dudok ba tengah bala di ruai sedia deka nyambut anak nya. Leboh nya indu pansut nyandik selok ka ruai dia iya ngelulu ka diri nyabak munyi anak mit ti baru ada, lalu ditimang iya mega. Indu bukai mega bisi nulong iya ngaga diri nyabak munyi anak mit. Lalu samoa orang maioh begau katawa geli ati ka iya dipeda tak bendar gaya. Datai di ruai anak nya lalu disambut apai iya lelaki ti udah dipadu ka tadi. Apai iya lalu naka penau ngelulu ka diri lalu betimang awak ka orang rami katawa. Udah nya anak nya tadi lalu dikujok enggau pua kumbu di tengah ruai.

Ripih pengawa udah nya, orang ngiga orang ke landik nimang diasoh nindok enggau ngerak anak nya tadi. Udah bulih orang ti diasoh nimang, samoa pengabang maioh jenoh enda inggar mending ka pemanah nyawa enggau leka timang. lya ke nimang nya dudok nunga kujok anak nya. Munyi tu leka timang iya:

NINDOK KA ANAK .

Wo-o-o-o-ho-o-wai.
Nyerumba linda sabong malam,
Nyerumba petang penyarang
Rumah nyeruran
Pasang gitang lampu dian.
Naka pengelembau aku ngangau
Ka tempalau dabong lancham.
Naka pemalu tudah aku
Di lempedu kandang dalam.
Laban penemu enggi aku
Nadai temu tuku kiba kanan.
Agi ga nyawa aku nadai didinga
Enda nyaris nekis inggar daderam.
Tang semadi tu ukai lambu aku
Ngelulu ka sida sanu ibu uman.
Ukai jawang aku nimang
Sulu timang ambai dalam.
Tang semadi gumi aku
Diasoh sida ke empu pengerami
Bebelah ka jeragang pinang kejekan.
Diasoh jayok nindok ka selok
Ka bebuah ngambi gambar miga dudok
Ka belingkok ngelong besimpan.
Semadi lumbi aku diasoh kita
Nindok ka selok ka bebuah manah nyelai,
Nadai ngelui
Ngambi gambar reni baya ngereman.
Nya alai ditindok ka aku
Nunda orang nindok Ka
Endu Kumang Subang Betandok,
Endu Achin Cheremin burit mangkok
Ambai Beragai Bini Tuchok
Datai ari puchok raba narok,
Jalai Laja nampok
Bulih tandok Telanjing burok
Ka belingkok ngelong besimpan.
Nya alai ditindok ka aku
Nunda orang nindok
Ka Endu Buku Kandong
Semambu buntat gamala,
Endu Kumang Kajang menoa
Bini Bujang Sempulang Gana,
Antu kelalu raja ke anda
Balat jedian kejekan.

Nya alai gali galai
Nuan selantang anak tuai
Di tikai janit anyam,
Dikujok enggau pelepok
Ampang belantan,
Bebungkor ka jadam,
Bepanggal ka intan
Dikumbai uman lambu gasan,
Bula limpan tekang la-gempanang wai….

O-wo-o-o-oh-wai———iiiii,
Tekang la-gempanang.

NGERAK ANAK.
Lebu Nangi.

O-wo-o-wai ……..
Dani nuan sendia anak seridi,
Ka gali galai di tikai anyam diri,
Bebungkor enggau menyetor
Ampang menyeti.
Serayong indai Mendong
Enggau tajong batik betawi.
Sengkidang Kumang
Enggau punggang bali menyeti,
Kemilai sida indai di kerigai rusok tisi.
Nya alai digela sida mengua karong beridi,
Ngagai anak kunchit kemali,
Begamal lanji-lanji
Mandi pentali panchor ulak bebuli.
Tang enti tinda nuan deh endun dara
Nyau udah jementa dara mereti,
Pandai di chunggai ujong jari,
Gawa nadai saga enda betanya
Ngagai sida mengua karong beridi.
Panau belakang nuan endun Kumang
Nyau udah terang
Mandang bujang anak lelaki.
Nya alai nuan digela sida
Mengua karong beridi
Ngagai sumbu lampu api
Ke pegari tampak terang.

NGERAK ANAK.
Lebu Ngambat.

Nya alai enti tinda nuan
Nyau udah jementa dara memetat.
Panau isi beranti pati pusat,
Panau bangi sajari nadai rarat.
Pandai nuan di chunggai tunjok empat,
Gawa enda saga nadai betanya
Ngagai sida mengua karong menyimat.
Nya alai digela sida mengua karong menyimat
Ngagai jerumat jarum kawat
Tak rejat-rejat nancham lipat ara tajong.

NGERAK ANAK.
Lebu Nyangkong.

Nya alai, enti tinda nuan
Deh kau lantang anak sendia
Nyau udah jementa dara lempong.
Pandai di chunggai ujong kudong,
Bisa di penyura nyawa ujong dabong.
Gawa pan nuan nadai saga
Enda betanya ngagai sida
Mengua karong kerubong.
Nya alai nuan disabaka ka orang
Enggau bini Linggir benama Anong,
Bini Bayang Indai Tiong
Pandai di chunggai jari ujong.
Landik ngama ai lia
Di pala dulang midong,
Landik nyagam ai garam
Bengaran ka delapan buloh laung.
Nya alai samoa kita digela ka orang
Ngagai jenuar kapal lambong
Benyawa rengong-rengong
Munyi sayap burong
Emperegam kampong.
Nya alai agi ga kita disema ka orang
Ngagai menyanggit bukit Santubong,
Begamal renjong-renjong.
Kaki alun gigi gumbang besabong,
Ari sapiak gulu karak batu anggong.
Punggang setak tumboh kara jemera riong,
Punggang setak tumboh bunga ketula raung
Di inang Kumang seduai Lulong,
Indu sida di Liu Nyatu Padi.
Diambi ka dujong,
Ko aku — lah — sanggul lintang — wai.
O-o-wai.

TlMANG ANAK.

O-o-o-wai —— ah.
Naka penyuma aku nelenga
Ka rasa dabong gigi.
Nyerumba linda lemai hari,
Nyerumba petang penyarang
Rumah menchegi.
Tang ukai jawang aku
Ka nimang sulu tunang ambai ati.
Ukai lambu aku ngelulu
Ka sida sanu ibu kedi.
Tang semadi tinda aku
Udah alah asoh sida ke empu kereja
Pun pengerami,
Bebelah ka jeragang pinang penguji.
Nya alai seit pinang kunchit
Alit di burit lega di ati,
Leka pinang segala dibelah dara Jata
Di baroh singka miga ngeledi.
Kumang ka tebilang tambun puji,
Pandai di chunggai ujong jari,
Indu sida di Liu Nyatu Padi.
Lalu disimpan sida ibu uman
Dalam jelanan tanggam demam resam ransi.
Udah nya baru tembai bejalai pansut ka ruai
Ngiga apai tangkai mengadi.
Lalu besangin indai mempulu lilin
Munyi Baketan palin ngua lilin madu rari,
Lalu muchau indai burong bangau
Munyi Melanau nimbau tukau tanjong Keladi.
Oh! Ni kita deh Sapungga, Sapuntang Medang
Ke udah ngundang aku di simbang papan paji,
Enda ninga kita anak tua endun dara
Nebah nyawa nyabak berai.

Oh! Nama kabuah enda ninga deh indai dara,
Uji surong kitu deh indai endu bini kami.
Tak lalu disua ka indai puna bangka
Lantang anak randa enggau tapa jari beresi,
Lalu sambut apai sempidan bangkut
Enggau kukut ujong jari.
Lalu betimang apai Kumang
Bedindang badi-adi.
Adu-adu kemah ko iya,
Anak aku tak lalendu
Baka lamba batang kayu peru
Tumboh di ulu Seblak menchegi.
Linga-linga kera lantang anak randa
Baka lamba batang kayu kara
Ke tumboh di ulu dia
Pumpong sadepa rarah jelenga
Pangka ka bua pusin bebuli.
Melan-melan salantang anak pinan
Baka lamba batang kayu tekam
Tundan delapan semilan begulor tali.
Lenggi-lenggi anak diri indah enda baka
Lamba batang kayu tuwi
Ke tumboh menoa ili ngerapi madang papi,
Kemah ko timang sida menimang karong beridi.
Nya alai, diatu deh Endun Dara
Ke agi meraya nebah nyawa nyabak berai,
Tang enti tinda iya
Nyau udah jementa dara mereti.
Nyau udah tinggi di lepi sanggul diri,
Pandai di chunggai ujong jari.
Ukai enda iya digela kitai
Kaban mengua karong beridi
Ngagai anak pekaban
Ikan enseriban padi,
Ke begamal lanji-lanji
Betanjak di kaki
Kerangan nunggang.
Wai —— ii.

BERISAN ENGGAU BUNGAH.

SERETA UDAH badu nimang anak samoa orang lalu richah laban berisan, ngirup enggau makai utai ti endang udah lama ayan. Samoa sida ke pangkat apai indai, pangkat aya enggau ibu seduai ke dibelah ka pinang lalu begempuru dudok belaban berisan, Bebalas-balas sida meri pangan ngirup, beripih samoa kaban lelaki ngelaban kaban indu. Balat bendar pengerami, nambah ka sida ke berisan samoa orang bukai numboh ka pemungah ngirup enggau pengerami bukai baka mencha enggau ngajat. Sekeda pengabang barang ke bisi mai ai tuak tauka arak ngambi utai nya kena sida bebalas meri orang ka empu rumah. Laban pengerami balat, nya ngasoh orang enda berasai ngelu pala lalu mabok. Enti pala udah ngelu, barang ke bisi mantai ka ubat enda mabok, lalu meri pangan ke nadai. Barang orang ti gali diangkat ka lalu beri ngirup. Sekeda bala ke mabok di intu kaban iya enggai ka pedis. Barang ke minta indu enggau minta bungai diasoh enggau diperansang orang ka empu rumah. Enti leboh orang balat bungah begagai, suah mega peda aku orang ka empu rumah, empu ruai ngulu ka pengabang mabak pemanggai enggau dinding iya empu ukai enggau ati pedis, tang empa pemalat rindu ati. Tang nyau kamaia hari tu jarang bendar bungah kasar bakanya laban rumah nyau udah kukoh udah tegoh, rumah papan rumah tebelian lalu jarang bisi pemanggai ulih babak. Nya alai orang rebak biak diatu, laban enda teleba tauka enda kala meda bungah bansa nya jampat deka pedis ati lalu belaya leboh sida meda pemungah baka gaya kera dipeda sida.

Siti ari pemaioh macham pemungah ti enda agi dikena kamaia hari tu iya nya ngetas pintu. Bala orang bejalai niti rumah beketas ka pintu. Udah sida ngetas pintu, sida dudok ba tempuan nganti orang ke empu bilik meri sida arak tauka tuak enggau penganan. Lalu siti agi jarang mega iya nya manjok. Pengabang nan panjok di moa pintu lalu orang ka empu bilik meri tuak enggau arak enggau manok nya ke disintak panjok sida. Barang ke enda nakal ngirup sigi lembau enggau orang bungah macham tu enggai ka mabok.

NGIRUP KUPI ENGGAU MAKAI ASI.

UDAH JAM chukop maia ngirup kupi, orang ti jaga jam lalu begerah ngasoh orang betanggong enti utai udah sedia. Samoa pengabang diator dudok lalu orang ke bungah diasoh ngetu. Tang bisi mega sekeda ti enda ulih asoh ngetu majak bebuti enggau tuak laban pala nyau ngelu. Kitai nemu enti pala nyau udah ngelu tentu enda ngasi ka rara orang. Udah utai ditanggong ka ruai samoa pengabang lalu ngirup magang. Bala orang ka indu ngirup kupi makai roti mega di bilik. Udah orang badu, samoa utai ditanggong pulai ka bilik magang. Enda lama takah udah nya orang belaboh baru bungah, birup ka tuak enggau arak, pia mega orang ke ngajat, mencha tauka bepantun belaboh baru.

Orang ti jaga jam maia makai lalu bejalai tama tiap-tiap pintu ngerah orang ka indu berapi. Kira pengumbas iya pengelama udah nya sida bejalai baru meresa pemansau utai ti dipandok. Enti samoa udah mansau, nya baru sida begerah ngasoh orang ka indu besungkit. Udah nya baru orang ka lelaki betanggong baru ka ruai, hari pan nyau ka tawas maia nya. Samoa orang ke ngirup enggau main bukai diasoh ngetu magang enggai ka enda makai. Udah samoa pengabang diator dudok baka ke udah, lalu pemakai pan udah ga chukop ator, nya baru ngasoh pengabang makai belubah-iubah. Badu makai samoa utai ditanggong pulai ka bilik. Samoa pengabang makai naka pengenyang enggai ka pulai lapar.

Badu makai belaboh baru ngirup ngabis ka ai, Samoa ai dibantai ka magang awak ka pengabang ngabis ka ai. Maioh bendar ruai alai orang nudok ka takar, bisi mit bisi besai takar, pia mega asai ai bisi nyamai bisi enda nadai sabaka. Ukai main pengerami leboh orang betakar ngabis ka ai tuak.

Nya alai sema jako kitai munyi ke “ngabis ka ai” tauka “ngalah ka takar” enti orang ragak.

Orang ke empu rumah naka ulih meransang pengabang ngirup awak ka sida mabok lalu enda ulih pulai. Enti orang mabok gaga bendar ati orang empu rumah. Tang pengabang mega naka ulih nguji ka ubat enda mabok barang ke bisi. Enti hari nyau tawas lalu ai agi maioh, suah dipelintang ka orang empu rumah alu ba pala tangga enggai ka pengabang pulai.

PENGABANG PULAI.

NYAU TAWAS hari, samoa pengabang besikap enggau ati gaga mulai ka diri mai indu. Sida ka biak begendang niti rumah ari setak ka setak ngerah samoa pengabang bebai pulai lalu ngansak sida ka indu beradu masok ka ngepan. Sapagi-pagi nya indu ke diambi enggau indu pengabang ke be ngepan beradu magang. Udah samoa sida tembu lalu dipejalai ka niti rumah dua tiga kali besundang enggau gendang awak ka samoa orang meda pemanah gamal sida enggau pemanah ngepan. Badu bejalai niti rumah lalu nurun ka tanah begadai-gadai nitih ka pangkong gendang. Samoa pengabang pulai magang enggau ati gaga ati rindu mai indu enggau panjong enggau katawa. Barang pangan ti agi mabok di ma pangan iya, lalu sabarang ke ngelu pala ngirit diri di iring pangan, ama rebah ama terap. Nya ti ngerami bala serantu jalai.

Enda jauh udah ngejang ka rumah bala ngetu awak ka indu ke bengepan muka ngepan sida lalu begari ngena gari kena bejalai. Tang enti merau ngepan indu enda dibuka nyentok ka datai ba pengkalan rumah lelaki. Udah tembu bebuka ka ngepan bala mupok bejalai begadai-gadai datai ka pengumbas iya alai ngetu belelak tauka merarau. Sida ke begendang nadai ngetu udah siko-siko besilih-silih nebah gendang. Nyau datai ba semak rumah tauka ba pemandi tauka pengkalan, dia bala ngetu magang mandi enggau begari ngena gari manah. Orang ke enda enggau tinggal di rumah endang udah sedia nganti bala datai. Rumah udah disikap sida kenyau ari pagi hari nya. Tempuan, ruai, pantar enggau bilik dianchau ka tikai magang lalu tempuan dikajang pua kumbu magang samanjai rumah. Pia mega bilik, endang udah dipadu ka alai indu tama dulu enggau bilik laki iya udah mega dilagu sereta dianchau pua kumbu naka pemanah. Dulang enggau batu pengunsut udah disedia ka ba pala tangga enggau babi ke digayang kena bala niki udah garing-garing ba kaki tangga.

Badu mandi samoa orang beradu sedia deka niki, samoa ngepan dipasok ka baru. Orang ke beradu besak ati laban gendang bala sida timbal gendang bala ke nganti di rumah. Tembu beradu bala lalu bejalai belubah-lubah nitih ka gendang, kenulu ka orang ka tuai betangkan-tangkan nitih ka penuai. Datai ba kaki tangga lalu apai indai indu tauka barang orang bukai ti patut enggau ari rumah indu lalu diasoh ngayang babi ke lama udah garing-garing dia.

Udah babi mati, nya baru bala niki tang enda diwong baka niki ba rumah indu, semina dipejalai ka besundang niti rumah awak ka orang maioh meda indu ti diambi enggau indu bukai mega ti bengepan. Chukop sundang dua tiga kali indu lalu dibai tama ba bilik orang bukai dulu ti endang udah disedia ka orang alai iya tama.

Nyau kalama, udah ngirup indah ba bilik nya, bala indu lalu mai iya ngagai bilik laki iya. Indu ti diambi endang selalu dipeda malu moa iya, tang ati iya di dalam enda kitai nemu. Udah dudok udah indah, nya baru iya muka ngepan iya lalu begari ngena kain baju ke manah.

Endang sigi adat leboh indu baru datai ba rumah laki iya, iya dibai tama bilik orang bukai dulu. Bakanya mega endang sigi adat, lelaki ti empu bini di ambi enda tau di rumah leboh bini iya niki, tang belalai sebelah babas tauka ba langkau ti semak rumah nya, Kabuah alai pia, orang ka tuai nadai madah ka kabuah enggau pemali.

Nyau udah malam hari nya baru lelaki nya datai niki ka rumah ngena gari naka pemanah ti kemisi iya. Udah hari nyau petang, orang ka indu di bilik nyerungkai sarang gari indu lalu ngeredai samoa iya dalam bilik awak ka orang samoa meda laban tu endang sigi adat.

Lemai nya samoa orang ka lelaki makai di ruai lalu indu makai di bilik. Nya tanggong orang ti empu kereja. Udah babi ti kena orang niki tadi tembu bela, asi pan udah ga mansau orang lalu bekumbai makai. Samoa orang dudok di ruai lalu asi enggau lauk ditanggong ka ruai, lalu chapak mangkok disadong nyelinting tuboh. Diatu samoa orang makai majak ka diri. Badu makai enti bisi agi ai tuak enggau arak lalu belaboh ngirup. Pengerami pulai ngambi indu nitih ka pemisi utai enggau peneka orang ti pun pengawa.

BEBIAU.

UDAH BADU makai lemai kira jam pukol semilan tauka pukol sapuloh, indu ti diambi enggau dua tiga iko indu ke empu rumah beradu masok ka ngepan laban sedia deka bebiau. Pia mega lelaki ti empu bini enggau dua tiga iko orang ka bujang beradu ngerias diri. Udah sida sama tembu orang lalu ngumbai lelaki tama ka bilik. Lelaki tama enggau sida ti ngulu ka iya, lalu samoa sida enggau indu mega dudok atas satawak ti dibap enggau pua kumbu genap tuboh sida. Tau mega dudok atas kerusi dibungkor pua kumbu enti bisi kerusi chukop tuboh sida. Dia sida dudok betunga moa tauka berimbai-rimbai nitih ka ator orang ti ngator sida. Malu bendar moa indu dipeda, ama mirah, ama puchat gamal moa iya dipeda, lelaki pan pia mega. Orang maioh bendar ngenjing penoh bilik, sekeda nilik ari sadau lalu sekeda bediri ari ruai enggau nyengok ari lubang penyengok ti ngimbai bilik nyau berebut deka meda. Enti rumah enda tegap tentu enda tan laban pemaioh orang. Dia orang rami bendar, barang ke bungah, bungah, barang ke katawa, katawa, sama gaga ati.

Enda lama udah nya orang ke diasoh miau seduai lalu datai. Orang lalu nyua ka manok ti kena bebiau ngagai iya lalu digerempong ka iya kaki manok nya. Udah nya iya lalu bediri nyebut leka biau, orang maioh diau jenoh enda ragak mending ka leka biau, Nya alai pun biau iya munyi pun biau bukai mega, ari:

Sa, dua, tiga, empat,
Lima, enam, tu-u-u-joh!
Aku ngangau ka Petara Aki,
Petara Ini, Petara Apai, Petara Indai,
Sempandai ke ngaga kitai.
Minta tulong minta sukong,
Minta tela minta peda,
Minta iching minta perening.
Awak ka bekebong baka langit,
Betuchong baka bukit.
Bepunchak baka jala,
Betuchong baka Lingga.
Bulih mudah, bulih gerah.
Beranak, betelesak,
Baka tebu lulong tambak,
Baka pisang lulong anak.
Gerai nyamai, gayu guru,
Nadai apa ko Petara.

Pengabis leka biau manok lalu disayat, orang pan lalu begau nempap ka jari gaga ati. Udah nya darah manok tadi lalu kena ngenselan seduai melaki bini. Lepas nya orang ngirup, bungah enggau makai utai naka pemisi utai dia. Lelaki ti dibiau tadi pansut ka ruai lalu indu mengkang diau di bilik nya mega. Nyau jauh malarn orang sarumah nya pulai tindok ngagai bilik diri empu magang nat ka pengelelak ulih dua hari ke udah. Tang lelaki ke bebini apin patut tindok ka bilik begulai enggau bini iya malam nya.

NYUNDANG PINANG.

TIGA MALAM ka empat hari indu udah datai ba rumah lelaki alai seduai melaki bini nurun nyundang pinang ngagai rumah indu. Bisi siko dua orang ke bujang ngulu ka seduai lalu nulong mai gari, penganan tauka utai bukai ke temu orang ti ngulu penatai seduai di rumah indu. Taja pan timpoh endang tiga malam alai nyundang pinang, enti enda lantang jai mimpi, bisi ninga burong jai tauka ninga orang bisi parai, apin ga nyadi sahari nya, tang nganti hari bukai ke lantang. Enti bisi orang parai didinga rita sekumbang apin nemuai, nya enda manah. Tang udah nya seduai tau belega enda begulai sabulan clua. Pia mega enti bisi mimpi enggau burong jai dalam kandang pemali, seduai diasoh belega dulu tauka asoh empa orang ke sigi tau makai burong, makai mimpi awak ka nadai apa-nama. Pia mega enti sema burong tauka mimpi balat jai diabas enggau atau babi kena nyenaga iya. Enti atau babi jai seduai enda tau jadi. Tang utai ke bakatu jarang bendar nyadi laban enti burong balat jai datai ka dua tiga iko orang di asoh makai awak ka tabar lalu enda nganu.
Tang tau mega nyadi enti lelaki tauka indu madah ka diri bisi mimpi jai ditempa ka ngapa laban enggai jadi tang takut betimbang. Tang utai bakanya mar bendar kitai nyagam. Nyangka laban endang enda tentu deka ka pangan, tang laban alah pejal apai indai.

Tu pulai ngagai penurun seduai ke mansang nyundang pinang baru. Serantu jalai sida bejalai mending lalu berati ka burong. Enti lelaki endang nemu burong sida manah, iya enggai nusoi ngagai orang bukai laban endang temu iya manah enggai ka kabau. Leboh datai di rumah sida niki baka temuai bukai mega. Udah begari udah dudok indah orang maioh sarumah nya datai ngulu penatai sida. Orang ka indu begulu di bilik, lalu orang ka lelaki begulu di ruai mega. Samoa utai di empa ti dibai sida diserungkai lalu di empa orang ke ngulu dia. Sarang gari lelaki diserungkai lalu samoa gari iya di redai di ruai awak ka orang meda pemaioh enggau pemanah, laban tu endang adat. Maioh pan gari lelaki iya enda tau enda nginjau salambar dua gari orang bukai nitih ka adat. Tiga hari, tiga malam gari mengkang diredai di ruai.

Sekumbang tiga malam nya lelaki patut tindok di ruai. Enti iya nemu reti, patut iya anang beguai tindok dulu ari orang ke empu rumah tang naka ulih tiga lemai nya nat ka diri. Kabuah pia, laban enti samoa orang udah tindok magang, iya bisi ninga rusa, kijang, pelandok, punggu laboh tauka burong bukai enti orang bukai sarumah nya nadai ninga, tang semina iya aja. Nya manah bendar burong ngasoh kaya ngasoh raja ngasoh panjai umor tauka berani. Tang enti orang bukai sarumah nya bisi ninga lalu bisi nyebut pagi, burong nya enda manah lalu enda tau enda asoh empa orang, tauka seduai iya belega.

Enti lantang udah lepas tiga malam seduai iya mulai ka diri. Sida ke nganjong seduai udah pulai dulu naka samalam aja, Udah seduai angkat, samanjai jalai seduai bejalai enggau lantang mending ka burong engka bisi burong manah nyentok ka datai di rumah diri empu. Enti sema bisi burong salah tauka jai diasoh empa orang, awak ka tabar nadai ngapa, nadai nama.

Udah seduai datai di rumah pulai nyundang pinang nya meh pengabis adat melah pinang lalu nadai pementi nadai pemali agi ke betimpoh nemuai. Udah nya nemuai lantang ati, nitih ka pengelantang enggau peneka ati seduai melaki bini. Enti baka lelaki nguai ka indu, udah lepas nyundang pinang nya baru seduai mulai ka diri nitih ka pengelantang ngagai rumah indu. Ator ke manah sataun nya seduai gawa kia, gawa kia, reti nya ngelama nya ba bilik indu, lalu ngelama nya ba bilik lelaki sekumbang ke agi rumpas, enti nienoa enda bengat jauh. Pisit agi nemuai manah agi sataun nya, ukai belama iya. Siti kabuah manah ari pisit nemuai sakumbang taun baru jadi laban samoa diri sabilik ti ditinggal ka belaki tauka bebini enda nyamai ati, lalu enti bejarit nemuai enda tentu balat berasai ati enggau lelengau. Leboh menantu enggau anak bam datai nemuai balat bendar pengaga ati, ukai ba siko aja tang samoa mensia, ngembuan ati nya magang.

Extracted & recompiled from a book Melah Pinang, originally written by late Mr. Alli Majang of Lichok, Sabelak, Saratok.