Adat & pengawa melah pinang (sarak)

SARAK.

ENTI ORANG sarak baru udah melah pinang, sakalika lelaki tauka indu enggai ka pangan agi enggau nadai tentu tegal, sapa seduai muai pangan kena tinggang penyalah nitih ka pemesai ukum di menoa nya. Enti sema lelaki muai indu, penyalah iya besai agi ari enggi indu. Nambah ka ukum Perintah iya mega di pinta mayar pemalu ngagai iya ti dibuai, nitih ka pemesai adat ti selalu dikena di menoa nya. Bisi mega sekeda lalu apin begulai, enda tanti ka nyundang pinang alai muai pangan, tang jarang ke bansa nya. Utai ke bakatu selalu nyadi enti ati barang sapa seduai ka jadi nya endang enggai, sakalika enggai ka gamal, bisi orang bukai dikadeka tauka tegal bukai, tang alai nyadi melah pinang laban pejal apai indai. Kabuah alai minta pemalu ngagai iya ke muai, laban tu dikumbai semina ngabas ruang bilik orang, nya kabuah apai indai malu. Kereja bansa nya endang jai, semina beduan, ngayah, ngasa lalu ngemalu orang. Suah mega apai indai iya ti dibuai minta bayar pengerugi ti udah kena melah pinang.

Enti sema sarak nyau udah antara bulan antara taun taja nadai tentu tegal lempong agi ga penyalah lalu pemalu nadai dipinta apai indai. Tang enti sema sarak maia nyau bisi anak lain agi ga adat. Temu aku jarang orang ke sarak enti nyau udah bisi anak enti nadai tegal ti besai laban ati nyau lebih agi ngerunding anak. Iya ke diatu adat Iban muai pangan kelalu lempong, nya alai orang mudah bendar ngelengka ka pangan. Bisi mega aku nemu runding sekeda orang endang rindu ka maioh rambang, laban nya manah ko sida. Kabuah alai manah ko sida laban maioh orang deka, lalu sida ngemenang ka diri tampak bebini tampak belaki. Pelaba aku nyangka maioh orang setuju enggau aku ngumbai ati enggau runding ti bakanya salah bendar lalu enda tau enda diubah.

Jangka aku orang ke jadi enggau jalai melah pinang lubah agi sarak enti chukop jako, chukop aum apai indai enggau seduai ke jadi, laban ngenang pengerugi enggau pengiroh diri empu enggau kabari belayan kulu kili ti udah besaup ka pengerami nya. Nya alai enti ulih anang ngudah ka din bebini belaki laban enda lebu asai bisi pengiroh enggau pengerugi.

Extracted & recompiled from a book Melah Pinang, originally written by late Mr. Alli Majang of Lichok, Sabelak, Saratok.