Cerita Bisi Budi Bisi Balas

Bisi Budi Bisi Balas

Nampung jerita tuai kelia, bisi dua iku diri menyadi ke udah parai apai indai. Lebuh maya nya musim urang berimba endur bumai. “Kati ke urang bumai magang, enda bumai tua deh adi?” ko tanya madi iya ke biak. “Endai enti nuan ka, belabuh meh tua jang”, pia ko saut Lugat.

Ngie urang bebesai dandang umai, sampai meniga empat munggu, tang ngau seduai madi laban ke agi nembiak mina mit aja. “Hes! nyamai ta nibuh bumai enti umai ngemit nya, ta ngumba kediri”, pia ko aya seduai iya.

Baka urang nya meh seduai iya semadi, urang nugal, nugal, urang mantun, mantun ga seduai iya, ta sama mupuk meh seduai menyadi. Umai seduai din ba tuchung bukit, nyau bebungkuk seduai iya niki tatai. Ni tanah landai ambis dialah ke urang bukai. Tebiang nya meh ngie seduai.

Tembu seduai iya ngintu umai, padi seduai iya pen nyau belabuh mansau, ngau urang bukai pen bakenya. Urang lalu belabuh ngetau tang seduai iya dudi agi ari urang laban ke enda besai umai.

Enda mukai-mukai, bisi siku inek tuai datai ke menuanya. Iya ka minta ngau urang ngetau tang nadai ga urang ka ngemai iya, tanya iya siku enggai, tanya iya siku nadai ga urang ka. “Empa kami empu enda umbas tu ibuk, ukai enda sinu ke nuan” ko urang.

Nyu datai ba ujung dandang umai, alu nadai ga urang ka mai iya. Udahnya nyu mansa umai seduai menyadi. “Apu, ngetau seduai ucu?” ‘Au’, ko seduai madi iya. “Ka seduai mai aku ngetau ucu?”, ko indai tuai nya. “Endai inek, sama mai meh, enti ambis badu ga. Engie tua iya sigi tak ka mimit ga”, ko madi iya ke tuai nya

Udahnya, nama deh, ngetau meh sida sebuat iya. Ta ketau, ketau, ketau sida iya ka mimit aja, peda penuh ga sintong, lalu enda nginsit sida tiga ari endur nya, semina nguing ke tubuh aja. “Nama padi tu ta mayuh endar”, ko seduai bejaku dalam ati.

Tembu sida ngetau, ta disimpan indai tuai nya padi ba langkau, apu! peda penuh ga langkau. Nama! urang ke bumai besai nya tadi, nama utai ulih. Udahnya, meda seduai bulih padi, urang ke jai jaku baka bala sida aya iya lalu bejaku “Uu, nama seduai nya umai ta ngemit nya bulih amat padi, amat antu seduai nya!” . Enda sida iya nemu inek tuai nya ke indu antu ka ngau sida enggai ngemai.
Diatu nembiak dua iku nya kumbai sida antu.

Padi ke udah nyadi berau nya kenu ko jerita, semua benda seduai madi ambis diisi indai tuai nya. Padi ke bedau dikuyan mayuh. “Kada enda ngetau umai urang”, ko sekeda. “Tang nadai ga urang sebana” ko kedua ga berandau. Majak berandau meh bala urang meda seduai madi mayuh mat padi.

Tinduk seduai menyadi lemai nya seduai iya lalu bemimpi, “Aku pulai ucu, tu meh nangka aku nulung seduai madi, enggi seduai enda alah empa padi tu ucu engka ke setaun tu. Ngambi ke tanda pemanah bbudi seduai, tu Selabit batu pengait tau dikena seduai enti ngetau ila ucu” ko indai tuai nya nganu seduai madi. Udahnya seduai lalu tedani meda indai tuai nya udah nadai agi diak. Nama deh, lalu begawai meh seduai madi ngintu petara ke udah datai nulung seduai iya.

Nya alai anang kakang ati nulung urang. Enti iya ngembuan ati ti jai ngagai kitai, petara iya ga nyumpah kitai senang pagila lusa.

-Pipit Bali