Adat & Pengawa Melah Pinang

PENGAWA MELAH PINANG

PUN JAKO ARI PENULIS ASAL.

JERITA KE ditulis aku dalam bup tu nusoi adat lama kitai Iban pasal jalai belaki bebini ke dikumbai Melah Pinang. Adat tu di tusoi aku beripih-ripih ari pun nyentok ka ujong.

Julok ati aku nulis bup tu awak ka sida rebak ti dudi agi ari diatu nyentok ka jemah ila nemu ripih adat asal bansa diri empu ba senentang Melah Pinang. Endang ari peda mata diri empu, pengerami belaki bebini ngena adat Melah Pinang kamaia hari tu nyau mupok berubah ari kalia, laban nitih ka pemansang dunya, ko jako kitai muntang iya. Bungkah iya ke nyengala agi ba mata kitai, baka pengerami ngajat enggau mencha endang main kitai ari kalia, tang kamaia hari tu suah diganti enggau betanda, nunda main Melayu. Ukai kitai ngumbai nya salah, lalu enda mega kitai ulih nagang iya, laban nya nitih ka ni bagi iya ti dikerindu ka mensia lebih agi tauka muntang agi. Tang laban bansa kitai endang bisi adat lama, adat asal ari aki ini kitai kalia, asai ti manah ga kitai agi ngingat, lalu nemu sekeda adat nya. Bakatu asai iya dalam ati aku, enti jerita kitai udah ditulis dalam surat baka tu, nya baru iya tegoh ditaroh, nadai tau nyau agi, lalu sabarang deka nemu, deka belajar tau macha iya dalam surat. Nambah ka nya, diatu nyau maioh ga bansa kitai udah masok pengarap bukai; lalu adat enggau pengerami melah pinang mansang enda dikena, lalu diganti enggau pengerami baru. Nya alai dalam penemu aku siko, asai kai nadai pulai ka penyalah tauka penyai enti kitai belajar ka adat lama bansa diri empu, laban nya endang pesaka asal, pesaka bansa kitai empu.

Samoa jerita ke ditulis aku ditu nitih ka gaya pengerami melah pinang ti dikena kitai Iban ba menoa Kalaka, dalam Bagi Kadua. Dalam pia jako aku nyerangkong samoa menoa kena pegai Kalaka, ukai mega adat enggau ator dalam rumah panjai sabuah-sabuah di menoa nya nadai sibil mimit-mimit enggau pangan, laban ator enggau adat enda ulih gaga sama sabaka. Tang iya ke ditulis aku tu tentu tebal dikena dalam menoa nya. Nya alai nyangka bisi sekeda utai ditulis aku ditu enda salubang enggau iya ke di menoa kita tauka enggau pengingat kita, nya ukai ati aku deka ngelimpang ka iya, tang tu nitih ka utai ti dikingat aku empu.

Samoa jerita ke ditulis aku ditu endang tebal agi pengingat aku empu didinga enggau dipeda aku maia pengerami melah pinang. Nambah ka nya bisi ga iya ulih aku betanya ari orang kai tuai ti endang bepenemu pasal nya, tang nama sida enda ulih rintai ditu.

Nya alai apin aku ngelengka ka genteran pun jako tu, dulu aku enda tau enda ngenang Benedict Sandin ti udah nyaup aku berurus jerita tu.

A. ALLI MAJANGSibu, 23 March, 1962.

RIPIH CHERITA(A) Penyalah Jadi Mali
(B) Penyalah Jadi Mali
Adat Belaki Bebini
Nanya Bini
Mansang Ngambi Indu.
Pengabang Niki
Masa Orang Empu Rumah.
Jako Melah Pinang
Betusut
Pinang Dibelah
Berisan enggau Bungah
Ngirup Kupi enggau Makai Asi
Pengabang Pulai
Bebiau
Nyundang Pinang
Sarak

(A) PENYALAH JADI MALI.

NYADI TERUBAH Iban nemu mantang orang jadi salah serak ari ajar Sengalang Burong leboh Sera Gunting beleman enggau ibu serta menyadi indai iya empu ke benama Dayang Langit ke digelar Dara Chempaka Tempurong Alang.

Nyadi ko Sengalang Burong nganu Sera Gunting. “Nuan enda tau enda kena pantang, laban nuan beleman enggau ibu nuan empu.”

Tang ko kaban menantu Sengalang Burong. “Nya amat aya, laban Sera Gunting endang amat uchu nuan, tang iya ke diau ba nuan ditu semina nemuai aja. Nya alai enti iya dibunoh, kasatu nadai mai berita pulai ka menoa iya empu, enggau kadua enti iya dibunoh kitai ditu, apai indai iya din enda nemu tunga iya. Tang dalam pia kitai enda mantang seduai iya, adat diadu ka kitai, awak ka seduai betimbang. Nyadi pemesai adat nya barang ko nuan empu ngator.”

Nya alai ninga runding kaban menantu iya munyi nya, Sengalang Burong lalu bejako, ko iya. “Enti munyi tu bunoh ka babi delapan, ka ganti darah seduai, nyabur delapan ka tungkat dunya ngambi ka enda beguyat. Nyadi pekasi menoa enggi lelaki sigi rusa, enggi indu sigi alas ngerang, tang anak seduai dibunoh, enggai ka ngachau menoa.”

Udah nya Sengalang Burong lalu ngasoh Sera Gunting ngingat ka adat kena ngadu ka menoa sida din enti leman bisi ngemesai tu:
(a) Enti beleman enggau anak (ukai jadi) kena pantang.
(b) Enti jadi enggau mentua, indai bini tauka apai laki, kena pantang.
(c) Enti beleman enggau anak bendar tauka anak iru, tauka anak tiri, enti udah nyadi anak kitai, kena pantang.
(d) Enti beleman enggau mentua, menyadi indai bini tauka apai laki kitai; lelaki kena tunggu babi siko, sangkar babi semilan, enggi indu babi siko, sangkar babi tujoh igi jabir. Seduai tau jadi.
(e) Enti serak satu enggau serak dua babi siko ari lelaki, benda semilan igi jabir; enggi indu babi siko benda tujoh igi jabir. Seduai tau jadi. Babi bunoh enggau nyabur.
(f) Nyadi enti serak dua enggau serak tiga ari lelaki babi siko benda sigi alas ngerang; enggi indu babi siko benda sigi panding. Babi bunoh enggau nyabor.
(g) Enti serak tiga enggau serak empat, lelaki babi siko, benda sigi panding, tu ke benama ‘kalih di darat.’ Babi bunoh enggau duku tang bebutoh kunding ka beliong.

Serak ka lebih ari tu semina agi bisi adat kena ngering ka samengat.

Nyadi adat tu dikena tujoh serak. Nya alai datai ba tuboh Beti ke digelar Bujang Berauh Ngumbang dia bisi baru orang beleman, Abang enggau Dayang Tali Bunga. Nyadi Tali Bunga nya anak petunggal Abang. Seduai tu patut disapat, tang enda tisi ka adat, nya alai deka dipantang Beti. Kejang deka mantang dia sida meda antu bejalai mansa, lalu ngangau nanya ka pengawa sida Beti. Beti lalu madah ka diri deka mantang Abang enggau Dayang Tali Bunga, laban seduai jadi serak satu enggau dua. Ninga munyi nya antu lalu bejako.

“Enti baka tu jalai nuan ngator mensia, Beti, abis samoa mensia mati.”
Beti lalu nanya ka adat.

“Adat,” ko Antu, “babi dua bunoh kita; siko bunoh di ai enggau siko bunoh di darat kena nasih ai enggau tanah. Nyadi benda enggi lelaki semilan igi jabir, enggi indu tujoh igi jabir, laban Abang jadi enggau anak petunggal iya empu ke baru sakali petunggal enggau iya.

Antu lalu enda ngasoh agi ngena adat bepantang. Enti orang beleman enggau serak ari atas tu endang enda tau jadi. Kamaiatu enti didawa ngagai perintah dijail; tang enda ga tau jadi. Enti beleman ari serak tu ka baroh sapat ka ai magang baka adat ke disebut dia tadi.

Extracted & recompiled from a book Melah Pinang, originally written by late Mr. Alli Majang of Lichok, Sabelak, Saratok.